ने. सं. ११४३ तछलाथ्व दशमी -

राष्ट्र संघीय सुरक्षा परिषद् बैठक : रुस व अमेरिका दथुइ तनाव

एजेन्सी- युक्रेनया सीमाय् रुसं सेना परिचालन याःगुयात कयाः अमेरिकां संयुक्त राष्ट्र संघया सुरक्षा परिषद्या बैठक सःतेवं बैठकय् रुसी व अमेरिकी राजदूत दथुइ तनाव ब्वलंगु दु । निम्ह राजदूतं बैठकय् आक्रोसपूर्ण अभिव्यक्ति बीवं बैठक हे तनावपूर्ण जूगु खः ।

अमेरिकी राजदूत लिन्डा थोमस ग्रीनफिल्डं रुसं याःगु सैन्य परिचालनयात दशकौं लिपा युरोपं खनाच्वंगु दकलय् तःधंगु सैन्य परिचालन धकाः धाःगु दु । लिसलय् रुसी राजदूतं अमेरिकां उन्माद न्यंकाच्वंगु व रुसी मामिलाय् स्वीकार यायेमफइकथं हस्तक्षेप यानाच्वंगु खँ धाःगु खः ।

बैठकय् रुसी राजदूत भासिली नेबेन्ज्यां रुसं युक्रेनय् सैन्य कारवाही यायेगु योजना दयेकाच्वंगु धयागु छुं प्रमाण मदुगु धासें रुसं आक्रमणया निंतिं सेना खटे याःगु धयागु खँ संयुक्त राष्ट्र संघं नं पुष्टि मयाःनिगु खँ धयादीगु खः ।

रुसं थःगु क्षेत्रय् सेना तैनाथ याःगु खँ वाशिंगटनया छुं सरोकारया विषय मखु धासें वय्कलं बाइडेन प्रशासनं वक्तव्यबाजी यानाः तनाव ब्वलंकाच्वंगु द्वपं बियादीगु खः । वय्कलं धयादिल, ‘थ्व जिमिगु देय्या आन्तरिक मामिलाय् अस्वीकार्य हस्तक्षेप जूगु जक मखु, थ्व क्षेत्रया वास्तविक अवस्था व वर्तमान विश्वब्यापी तनावया कारण बारे अन्तर्राष्ट्रिय समुदाययात भ्रमित यायेगु कुतः नं खः ।’

अमेरिकी राजदूत ग्रीनफिल्डं अमेरिकां कुटनीतिक समाधानय् विश्वास याइ धासें यदि रुसं युक्रेनय् आक्रमण यात धाःसा अमेरिकां निर्णायक पलाः ल्ह्वनीगु व उकिया लिच्वः ग्यानापुइगु ख्याच्वः बियादीगु खः ।

थ्वहे दथुइ बेलायती विदेशमन्त्री लिज ट्रसं रुसं युक्रेनय् आक्रमण यात धाःसा कडा प्रतिबन्ध तयेगु निंतिं तयारी जुइधुंकूगु धयादीगु दु । वय्कलं क्रेमलिन लिसे सतीपिं व्यक्ति व व्यवसाययात तःधंगु दायरा दुने लाकाः प्रतिबन्ध तयेगु कानुन तयार जुइधुंकूगु खँ धयादीगु खः ।
छम्ह अमेरिकी अधिकारीं वाशिंगटनं क्रेमलिन लिसे सतीपिं मनूतय्त अन्तर्राष्ट्रिय वित्तीय प्रणालीं हे पिनेलाइकथं प्रतिबन्ध तयेफुगु खँ धाःगु दु ।

युक्रेन समस्यायात कयाः कुटनीतिक कुतः नं न्ह्यानाच्वंगु दु । रुसी राष्ट्रपति भ्लादिमिर पुटिनं सोमवाः फ्रान्सया राष्ट्रपति म्याक्रोंलिसे टेलिफोन वार्ता यानादीगु दुसा अमेरिकी विदेशमन्त्री एन्टोनी ब्लिङ्कनं रुसी विदेशमन्त्री सेर्गेइ लाभ्रोभलिसे खँल्हाबल्हा याःगु दु ।