तःमुँज्या कन्हय्, थौं तकं कचमच
येँ – कांग्रेस पार्टीया झिंप्यक्वःगु तःमुँज्याय् उम्मेदवारी बीगु लागिं संस्थापन पक्ष व इतर निगुलिं पक्षय् सहमति जुइ फयाच्वंगु मदु । गुकिं यानाः निगुलिं पुचलं थःपिनिगु प्यानल घोषणा याये फयाच्वंगु मदुनि जब कि तःमुँज्या जुइत आः निन्हु जक ल्यं दनि ।
म्हिगः संस्थापन पक्षया बैठक च्वनाः पदाधिकारी व उम्मेदवार क्वःछीगु तयारी याःगु खःसां बैठक निष्कर्षबिहीन जूगु दु । प्रधानमन्त्री लिसें सभापति शेरबहादुर देउवां थःगु पुचःया पदाधिकारी व आकांक्षी नेतातलिसे सहलह यानादीगु खः ।
देउवाया भुइजःसिइ च्वंगु छेँय् जूगु उगु बैठकय् आकांक्षी अप्वः दुगुलिं सहमति जुइ मफुगु खः । बैठकय् ब्वति काःम्ह छम्ह नेताया कथं सभापतिइ देउवा निश्चित जूसां मेपिं पदाधिकारीया बारे धाःसा निर्णय जुइ मफुनि ।
बैठकय् उपसभापति विजयकुमार गच्छदारं थः सभापति बाहेक निगूगु पदया नितिं दावेदार जूगु धासें देउवा लिपा थःगु न्हापांगु दावी जुइगु खँ धयादीगु खः । अथे हे महामन्त्रीइ आःया सहमहामन्त्री डा. प्रकाशशरण महत, बालकृष्ण खाँण, एनपी साउद, ज्ञानेन्द्रबहादुर कार्की व विश्वप्रकाश शर्मां दावी यानाच्वगु दु ।
उकथं हे सहमहामन्त्रीइ खस आर्यपाखें किशोर सिंह राठौर, मधेशीं अजय चौरासिया व महेन्द्र यादव, मिसापाखें डा. डिला संग्रौला व महालक्ष्मी उपाध्यायं दावी यानाच्वंगु दुसा पुष्पा भुसालं नं छगू पदया दावी यानाच्वंगु खँ धाःगु दु । म्हिगःया बैठकं निर्णय याये मफयेवं थौं हाकनं बैठक च्वनीगु खँ धाःगु दु । बैठकय् पदाधिकारीया आकांक्षी अप्वयेवं निर्णय याये मफुगु खः ।
उकथं हे म्हिगःया बैठकं संस्थापन पक्षपाखें न्हय्गुलिं प्रदेशया केन्द्रीय दुजःपिंत थःथःगु प्रदेशया पदाधिकारी व केन्द्रीय दुजःया नां सिफारिस यायेत जिम्मेवारी बिउगु दु । प्रदेशया अध्यक्ष व उम्मेदवार लिसे सहलह यानाः आकांक्षीया नां सिफारिस यायेत निर्देशन बिउगु खः ।
मेखे संस्थापन इतर पक्षय् धाःसा आः तक सभापतिया उम्मेदवार तकं क्वःछी मफयाः सकस जुयाच्वंगु दु । म्हिगः पुलांम्ह महामन्त्री प्रकाशमान सिंहया छेँय् च्वंगु बैठकय् सभापति व मेगु पदया आकांक्षीया दथुइ बैठक च्वंगु खःसां नं निष्कर्ष धाःसा पिहां मवःगु खँ धाःगु दु ।
पौडेल पक्षपाखें सभापतिया आकांक्षी डा. शशांक कोइरालां दावी त्वःतेधुंकूगु दुसा प्रकाशमान सिंह व शेखर कोइरालां दावी त्वःतूगु मदुनि । उकथं हे उपसभापति, महामन्त्री, सहमहामन्त्री पदय् नं आपालं नेतात आकांक्षी जुयाच्वंगु खँ धाःगु दु ।
प्रकाशमान सिंहं थः सिनियर जूगु धासें गुगुं नं हालतय् दावी मत्वःतेगु अडान कयाच्वंगु दुसा पौडेलं थःत ग्वाहालि यायेत नेता सिंहयात इनाप यानाच्वंगु दु । कांग्रेसया तःमुँज्या कन्हय् निसें येँय् न्ह्यायेत्यंगु दुसा कंस उम्मेदवार मनोनयन दर्ता यायेगु ज्याझ्वः तयातःगु दु ।
LEAVE YOUR COMMENTS