राष्ट्रिय सभा निर्वाचन सत्तारुढ दलतय् दथुइ सहमति
येँ – सत्ता गठबन्धन दथुइ राष्ट्रियसभा निर्वाचनया निंतिं सिट बाँडफाँटय् सहमति जूगु दु । म्हिगः प्रधानमन्त्री निवास बालुवाटारय् च्वंगु बैठकय् सिट बाँडफाँटया सहमति जूगु खः ।
सहमति कथं कांग्रेसयात खुगू, माओवादी केन्द्र व एकीकृत समाजवादीयात न्यागू न्यागू, जनता समाजवादी पार्टीयात निगू व राष्ट्रिय जनमोर्चायात छगू सिट बीगु जूगु दु । मनोनितपाखे छम्हेसित सुयात छ्वयेगु धयागु बारे सहमति मजूगु खँ सीदुगु दु ।
राष्ट्रिय सभाय् ५९ म्ह दुजः दइसा उमिगु कार्यकाल खुदँया जुइ । अथेखःसां नं न्हापांगु छगू कार्यकालया निंतिं गोलाप्रथापाखें दुजःपिनिगु पदावधि निर्धारण याःगु खः । उकी मध्ये न्हापांगु निदँया दुने १९ म्हेसिया कार्यकाल क्वचायाः निर्वाचन जुइधुंकूगु दु । थुगुसी नीम्हेसिया पदावधि फुइत्यंगु दुसा मेगु निदँ लिपा मेपिं नीम्हेसिया पदावधि फुइ ।
राष्ट्रियसभा दुजःपिनिगु पदावधि फुइ स्वयां सुइन्यान्हु न्ह्यः हे निर्वाचन यायेमाःगु संवैधानिक व्यवस्था कथं आयोगं वइगु माघ १२ गते निर्वाचन यायेगु मिति क्वःछिउगु खः । थुगु निर्वाचनय् प्रदेशसभा दुजः व स्थानीय तहया प्रमुख लिसें उपप्रमुख मतदाता जुइगु व्यवस्था दु । देय्न्यंकं प्रदेश सभाया दुजःपिं ५३२, गाउँपालिकाया अध्यक्ष व उपाध्यक्ष लिसें नगरपालिकाया प्रमुख व उपप्रमुख १४९३ म्ह यानाः २०२५ म्ह मतदाता दुसा न्हय्गुलिं प्रदेशय् मतदानस्थल नं क्वःछीधुंकूगु दु ।
थ्वहे झ्वलय् थीथी राजनीतिक पार्टीतय्सं राष्ट्रियसभाया उम्मेदवारया नां क्वःछिउगु दु । नेकपा एकीकृत समाजवादीं राष्ट्रियसभाया उम्मेदवारया नितिं प्रदेश–१ पाखें जयन्ती राई (मिसा), बागमतिपाखें गोमा तिमल्सिना (मिसा), लुम्बिनीपाखे राजेन्द्रलक्ष्मी गैरे (मिसा), कर्णालीपाखें उदय बोहोरा (खुल्ला) व सुदूर पश्चिमपाखें मदनकुमारी शाह (मिसा) उम्मेदवार ल्यःगु दु ।
उकथं हे नेपाली कांग्रेसं नं राष्ट्रियसभाया उम्मेदवार क्वःछिउगु दु । म्हिगः च्वंगु केन्द्रीय कार्यसमितिया बैठकं उम्मेदवारया नां क्वःछिउगु खः । कांग्रेसं प्रदेश–१ य् गोपालकुमार बस्नेत, बागमतिइ कृष्णप्रसाद पौडेल, गण्डकीइ कमला पन्त, लुम्बिनीइ युवराज शर्मा, कर्णालीइ दुर्गाकुमारी गुरुङ, सुदूरपश्चिमय् नारायण मित्रयात उम्मेदवार दयेकूगु दु ।
उकथं हे नेकपा एमालें नं राष्ट्रियसभा दुजःया नितिं उम्मेदवार क्वःछिउगु दु । एमालेया सचिवालयया बैठकं राष्ट्रियसभा दुजःया नितिं झिंगुम्हेसिया नां क्वःछिउगु खः । फुक्कं धयाथें राजनीतिक पार्टीतय्सं थौं निर्वाचन आयोगय् वनाः उम्मेदवारी दर्ता यायेगु ताः तयातःगु दु ।
LEAVE YOUR COMMENTS