असार ४ तक नं चुनाव मजूसा राजनीतिक भ्याकुम !

येँ – असार ४ गते तक आम निर्वाचन मजुल धाःसा देय्या संविधान हे खतराय् लाये फइगु विश्लेषण थन यानाहःगु दु । संविधान कथं संसद भंग याःगु खुलाया दुने निर्वाचन ज्याझ्वः क्वचायेकेमाःगु प्रावधान दु । तर आः ब्वलनाच्वंगु राजनीतिक अवस्थाया कारणं सरकारं घोषणा याःगु तिथिइ जक मखुसें खुला लिपा अर्थात असार ४ गते तक नं मेगु निर्वाचन जुइगु सम्भावना मदयाच्वंगु दु ।

विज्ञ सूत्रया कथं निर्वाचन आयोगं निर्वाचनया तयारी याःसां नं स्वलाया दुने चुनाव जुइगु सम्भावना मदुसा थुकिं यानाः संवैधानिक संकट वये फइगु सम्भावना प्रवल दु । असार ४ गते दुने निर्वाचन मजुल धाःसा संवैधानिक ‘भ्याकुम’ ब्वलनीगु अवस्था दु । नां कने चाहे मजूम्ह छम्ह राजनीतिक विश्लेषकं कनादी कथं यदि असार ४ गते दुने चुनाव मजुल धाःसा देशय् संवैधानिक भ्याकुम ब्वलनी, अथे धइगु संविधान कोल्याप्स जुल धइगु खः । वयां लिपा छु जुइ धकाः आः हे धाये फइगु अवस्था मदु ।
न्हापांगु संविधानसभा दुगु इलय् नं संविधानसभा भंग मयाः उकिं म्याद थपे यानाः थःपिनिगु अस्तित्व ल्यंकातःगु खः, आः संसद हे भंग याःगु

कारणं संसदं थःपिनिगु अस्तित्व गुमे यायेधुंकूगु अवस्था दु । उकिं छुं जुयाः संसद पुनस्र्थापना याये मफइगु व निर्वाचन नं मजुइगु अवस्था ब्वलन धाःसा देशय् छगू कथं ‘राजनीतिक भ्याकुम’ ब्वलनी । अज्याःगु ‘भ्याकुम’ या फाइदा न्ह्यागु शक्तिं नं कायेफु ।

सूत्रया कथं वयां लिपा भारतीय डिजाइन कथं न्हापांगु संविधानसभा भंग जुइधुंकाः तत्कालीन प्रधानन्यायाधीश खिलराज रेग्मीया नेतृत्वय् सरकार
दयेकू थें आः हाकनं प्रधानन्यायाधीश चोलेन्द्र शम्शेर जबराया नेतृत्वय् सरकार दयेकाः न्हूगु निर्वाचन यायेगु प्रस्ताव न्ह्यःने वइगु सम्भावना दु ।
न्हापा नं बेबी किङया खँ वःगु खःसा आः उकियात मूर्त रुप बीगु कुतः जुइ फइगु संकेत नं सूत्रं बिउगु दु । यदि अज्याःगु कथंया कल्चरल किङ (सांस्कृतिक जुजु) या स्थापना जुल धाःसा देय्यात धर्म निरपेक्ष मयासे हानं हिन्दू राष्ट्र हे घोषणा यायेगु कुतः जुइफुगु अनुमान नं सूत्रं याःगु दु ।

प्रधानमन्त्री ओलीं आः यानाच्वंगु गतिविधि स्वयेबलय् जक मखु थीथी थासय् जुयाच्वंगु आमसभाय् वय्कलं न्ववानाच्वंगु खँया आशय स्वयेबलय् नं उकिया संकेत वयाच्वंगु सूत्रया दावी दु ।