धोविघाटय् डोजर आतंक

यलया धोविघाटय् नं डोजर चले याःगु दु । लिपांगु इलय् स्वनिगःया थीथी थासय् डोजर चले यायेगु झ्वलय् थौं सुथय् धोविघाट सनराइज अपार्टमेन्ट न्ह्यःने ७ः३० ताः इलय् आकाझाकां डोजर चले याःगु खः ।
स्थानीय छम्ह पीडितं कनादीकथं डोजर सरकारं हयाः चले याःगु मखसे स्थानीयवासीतय्सं हे उजुरी तयाः निजी कम्पाउन्डया पःखाः थुनेगु ज्या याःगु खः । डोजर चालकयात सुनां धयाः डोजर चले यानागु धकाः न्यनागु इलय् स्थानीयवासीतय्पाखें हे निवेदन याःगुलिं डोजर चले यानागु खः, सरकार वा स्थानीय तहंया निर्देशन कथं मखु धकाः लिसः बिउगु खँ स्थानीय सुमन महर्जनं ‘नेपालभाषा टाइम्स’ अनलाइनयात कनादीगु दु ।
प्राप्त जानकारीकथं यल महानगरपालिकाय् तकं मुद्दा लानाच्वंगु उगु निजी कम्पाउन्ड थुनेगु निंतिं छथ्वः स्थानीयवासीत हे सक्रिय जुयाच्वंगु खः ।
थ्व हे झ्वलय् डोजर आतंक पनेगु निंतिं वंम्ह सेभ नेपाः भ्यालीया अभियन्ता सुरज महर्जनयात नं स्थानीयवासीतय्सं ल्हाः वाःगु दु । स्थानीयवासीं ल्हाः वाःगुलिं बांमलाक घाःपाः जूम्ह अभियन्ता महर्जनयात अस्पताल यंकेगु दु । वय्कःया स्थितिया बारे थप जानकारी प्राप्त जूगु मदुनि ।
लिपांगु इलय् स्वनिगःया थीथी थासय् हाकनं डोजर आतंक न्यंकेगु शुरु जूगु दु । वंगु छुं दिं न्ह्यः जक यलया हे लगंख्यलय् च्वंगु वटुक भैरवनिसें सातदोवाटोतक डोजर चले याःगु खःसा मध्यपुर थिमिया मनहरानिसें निकोसेराय् नं डोजर आतंक न्यंकेगु ज्या जुयाच्वंगु दु ।