गुथिया अवधारणा दयेकेगु तयारी
येँ – गुथि विधेयकय् नेवाःतय् मंकाः अवधारणा दयेकेगु निंतिं गुथि विधेयक विरुद्ध एकिकृत आन्दोलनं सहलह न्ह्याकूग दु । नेवाःतय् गुथि छु गज्याःगु खः व उकिया ध्वाथुइकेगु व थीथी गुथि खलः पुचःपाखें मंकाः अवधारणा दयेकेगु निंतिं माःगु सुझाव कायेगु निंतिं उगु सहलह मुँज्या याःगु खः ।
मुँज्याय् थीथी जातीय खलः पुचःया प्रतिनिधिपिंसं थःथःगु खँ तयादीगु खः । मुँज्या लिपा मेगु वालय् थीथी खलः पुचःपिंसं गुथि विधेयकय् दुथ्याकेमाःगु खँयात कयाः थःथःगु धापू ज्वना वयेगु निर्णय नं याःगु दु ।
सरकारं गुथि विधेयक हयेवं स्वनिगःया नेवाःतय्सं आन्दोलन याःगु खःसा उकिया लिच्वः कथं सरकारं विधेयक स्थगन याःगु खः । सरकारं नं आः हाकनं विधेयक हयेगु तयारी यानाच्वंगु दुसा विधेयकय् छु छुं खँ दुथ्याकेमाली धकाः थीथी खलः पुचःया प्रतिनिधिलिसे सहलह यानाच्वंगु दु ।
थ्वहे झ्वलय् छुं न्हि न्ह्यः भूमि व्यवस्था, सहकारी तथा गरिबी निवारण मन्त्री पद्मा अर्यालं थीथी पुचःया प्रतिनिधिपिंत नापलानाः गुथि विधेयक बारे सहलह यानाः जक न्ह्याःवनेगुु खँ धयादीगु खः ।
उकथं हे खलः पुचःलिसे खँ ल्हायेगु झ्वलय् मन्त्री अर्यालं गुथिया १३९ बिघा जग्गा व्यक्तिं छ्यलाच्वंगु लूगु खँ धयादीगु खः । वय्कलं थम्ह छगू अभिलेख स्वयागु झ्वलय् उगु जग्गा व्यक्तिं छ्यलाच्वंगु लुइकागु खँ धयादीगु खः । लिसें मन्त्री अर्यालं गुथिया जग्गा गुलि व्यत्तिंm छ्यलाच्वन धइगु खँ सीमदु धासें उकियात कयाः अनुसन्धान यायेमाःगु खँ धयादीगु दु । वय्कलं गुथि जग्गाय् मोही खडा यानाः मीगु ज्या नं आः तक न्ह्यानाच्वंगु खँ कनादिल । वय्कलं न्ह्यःने धयादी, ‘मन्त्रालयया दकलय् तःधंगु चिउताः गुथि जग्गा अतिक्रमण जुयाच्वंगुली दु । दुःखया खँ छु दु धाःसा थौं तक नं अतिक्रमण जारी जुयाच्वंगु दु ।
वय्कलं गुथिया जग्गा संरक्षण यायेगु प्रमुख जिम्मेवारी गुथि संस्थानया खः धासें आः तक ७० जिल्लाय् गुथिया जग्गा दुसां नं गुथि संस्थानं उकियात संरक्षण याये मफयाच्वंगु खँ धयादिल ।
गुथि बारे नेवाः धापू
गुथि सम्बन्धी थःपिनि अवधारणा बीगु लागिं नेवाः खलःपुचःतय्सं तयारी शुरु याःगु दु । गुथि नेवाःतय्गु मौलिक प्रथा जूगुलिं थुकियात राज्यं छुं कथं हस्तक्षेप याये दइ मखु धइगु खँयात हे मूल रूपं न्ह्यःने तयेमाःगु निष्कर्ष नेवाःतय्सं पिकाःगु दु । सरकारं गुथियात कयाः न्ह्यागु हे कथंया व्यवस्था याःसां उकिया मूल मर्म नेवाःतय् गुथियात स्वतन्त्र त्वःतेमाः व उकी राज्यया अंकुश दये मजिउ धइगु निष्कर्ष नं पिकाःगु दु ।
LEAVE YOUR COMMENTS