
यल – वंगु ०७२ सालया तःभुखाचं स्यंगु प्यंगूगु शताब्दीया स्वयां पुलांगु इतिहास ज्वनाः मल्लकालय् दयेकूगु यलया लाय्कुली च्वंगु भिंद्यःया देगः पुनर्निर्माण यायेगु निंतिं यलया स्थानीय बासिन्दा थः हे न्ह्यज्याःगु दु ।भारत सरकारया ग्वाहालिं पुनर्निर्माण यायेगु धयातःगु थुगु देगः भुखाय् ब्वःगुयां प्यदँ लिपा नं छुं हे मयाःगु कारणं स्थानीय जनता थः हे लगे जुइमाःगु खः ।
‘झीगु सम्पदा झीसं हे दयेके’ धइगु मू नारा ज्वनाः न्ह्यज्याःगु थुगु देगः पुनर्निर्माणय् लुं सीगु खर्च बाहेक प्यंगू करोड ९३ लखया लागत तुइगु अनुमान ललितपुर उद्योग वाणिज्य संघया अध्यक्ष कृष्णलाल महर्जनं जानकारी बियादिल ।
स्थानीय बासिन्दाया मंकाः सहलहपाखें ‘भिमसेन मन्दिर पुनर्निर्माण सरोकार समिति’ गठन यानाः देगःया स्यंगु ब्व थुनेगु ज्या न्ह्यानाच्वंगु दु । थुगु देगः दयेकेगु निंतिं वाणिज्य संघं १० लख तका बीगु प्रतिबद्धता व्यक्त याःकथं आःयात ज्या न्ह्याकेगु निंतिं न्यागू लख न्यय्द्वः तका ग्वाहालि कथं बीगु ज्या जुल ।
अथे हे यानाः देगः पुनर्निर्माणया निंतिं तदर्थ समितिया दुजःपिंपाखें ९० हजार, यल महानगरपालिकापाखें १ करोड, थीथी दातातपाखें २ करोड व प्रदेश सरकारपाखें ५० लख दां बीगु घोषणा याःगु दु । अथे हे यल व्यवसायी व एभरेष्ट बैंकया अध्यक्ष बि.के. श्रेष्ठं थः अबुया नामं १ करोड आर्थिक ग्वाहालि याःगु जानकारी वाणिज्य संघया प्रशासकीय अधिकृत पुरुषोतम श्रेष्ठं बियादीगु दु ।
देगःया गजू, सिजः व धातुया पाता व मेमेगु महत्वपूर्ण वस्तु सुसाःकुसाः यायेगु जिम्मेवारी पुरातत्व विभाग, स्मारक संरक्षक तथा दरवार हेरचार कार्यालय यल दरवार संग्रहालयया निगरानीइ जुइगु खँ कार्यालयया प्रमुख काजीमान प्याकुरेलं कनादिल ।‘यलया इतिहासय् दान दातव्य’ धइगु धापूयात सार्थक यासें वंगु असार १२ गते साया न्हिप्यनय् खिपः चिनाः देगःया गजू लिकासें पुनर्निर्माणया ज्या न्ह्याकूगु खः ।
देगःयात माःगु दाचि अप्पा, अप्पा दक्षिण बाराही ब्रिक फ्याक्ट्रीया हिराकाजी महर्जन व तीर्थलाल महर्जनं उपलब्ध यायेगु व देगः निर्माणय् दक्व प्राविधिक ग्वाहालिया जिम्मा काठमाडौं भ्याली प्रिजर्भेशन ट्रष्टं यायेगु बचं कथं ज्या न्ह्याकूगु खः ।
नेवाःतय्सं आराध्य द्यःकथं नाला वयाच्वंगु थुगु भिंद्यःया देगः पुनर्निर्माणया निंतिं नेपाल सरकार राष्ट्रिय पुनर्निर्माण प्राधिकरण, पुरातत्व विभाग, काठमाडौं भ्याली प्रिजर्भेशन ट्रष्ट, मंगः टोल सुधार समिति, यल महानगरपालिका, यलया थीथी जातीय खलः पुचःत सक्रिय जुयाच्वंगु दु ।
LEAVE YOUR COMMENTS