बनेपाय् नवदुर्गा द्यःगणयात हातपात
भ्वँत- ख्वपया नांजाःगु तान्त्रिक द्यः धयातःगु नवदुर्गा देवगणया न्या लाकेगु जात्राया झ्वलय् भ्वतय् द्यःपिंत हातपात याःगु दु ।
द्यःगणया अन जात्रा जुयाच्वँच्वं हे स्थानीय मनूतय्सं आक्रमण यानाः देवगणया बागू दर्जन मनूतय्त घाःपाः याना बिउगु खः । उकी मध्ये रिजय वनमालाया ल्हाः त्वःधूगु खँ पीडित बनमालातय्सं धाःगु दु । बहनी १० बजेपाखे न्या लाकेगु जात्रा अन्तर्गत वसः हीगु दृश्य क्यनाच्वंगु इलय् उगु आक्रमण जूगु खः ।
देवगणतय्सं आः उपचार खर्च पुलेमाःगु, उछृंखल गतिविधि याःपिंत कानुनी कारवाही यायेमाःगु व जात्रायात निरन्तरता बीमाःगु माग याःगु दु । आक्रमणय् लानाः द्यःगणया विजय वनमाला, मंगललाल वनमाला, बालगोपाल वनमाला, रिजय वनमाला, कृष्णगोविन्द वनमालापिं घाःपाः जूगु खः । अन देवगणयात आक्रमण यानाः अप्पां कयेकूगु खँय् प्रहरीं स्थानीय प्यम्ह ल्याय्म्हतय्त ज्वंगु दु ।
प्रहरीं ज्वंपिनि छेँजःपिं व देवगणया दथुइ सोमवाः हे सहलह जूगु खः । जात्रा व्यवस्थापन समिति नीस्वनाः लिपा लिपा थज्याःगु जात्रा चले यायेत निगू पक्षया दथुइ सहलह यानाः थीथी निर्णय याःगु खः । वयां लिपा जक प्रहरीं ज्वनातःपिंत त्वतूगु खः । निगू पक्षया सहमति कथं आः छुं न्हि दुने हे बैठक च्वनाः भ्वँतय् गुकथं लिपा लिपा जात्रायात शान्त व व्यवस्थित यायेगु धकाः निर्णय यायेगु खँ धाःगु दु ।
LEAVE YOUR COMMENTS