
एजेन्सी- इंग्ल्यान्डय् कोरोना भाइरसयात कयाः तयातःगु थीथी प्रतिबन्ध चिकूगु दु । बेलायत सरकारं कोरोना खोपया बुस्टर डोज बिइधुंकाः कोरोना संक्रमण दर म्हो जुयावंगुलिं व अस्पतालय् गम्भीर विरामीया चाप नं म्हो जुयावंगुलिं कोरोना सम्बन्धी थीथी प्रतिबन्ध चिकूगु खः । थन बिहिवाः निसें लागु जुइकथं अनिवार्य मास्क तयेमाःगु नियम चिकूगु दु । अथे हे नाइट क्लब व तःधंगु सभा वा ज्याझ्वलय् वनेत कोभिड पास क्यनेमाःगु नियम नं चिकूगु दु ।
सरकारं वंगु वालय् तिनिं छेँय् च्वनाः ज्या यायेगु व स्कुलया क्लासय् च्वनेबलय् मास्क तयेमाःगु नियम चिकूगु खः । कोरोना संक्रमित मनू न्यान्हु तक सेल्फ आइसोलेसनय् च्वनेमाःगु नियम धाःसा कायम हे तिनि । सरकारं थीथी प्रतिबन्ध चिकूसा छुं व्यवसायी व सार्वजनिक सञ्चालकतय्सं धाःसा मास्क तयेत इनाप याःगु दु । लन्डनया मेयर सदिक खानं बस व भुमिगत रेलय् मास्क तयेमाः धाःगु दु ।
वंगु डिसेम्बरनिसें बेलायतय् खनेदुगु कोरोनाया न्हूगु भेरियन्ट ओमिक्रोनं यानाः संक्रमण दर तसकं थहां वंगु खः । थुकिं यानाः अस्पतालय् अप्वःगु चापयात पनेत व मनूतय्त बुस्टर डोज कायेत ई बिइगु निंतिं सरकार ‘प्लान बी’ प्रतिबन्धात्मक नियम लाःगु याःगु खः ।
बेलायतया स्वास्थ्य अधिकारीतय्सं बिउगु जानकारीकथं १२ दँ सिबें च्वय्यापिं ८४ प्रतिशत मनूतय्सं कोरोना विरुद्धया निगू डोज कायेधुंकूगु व निगू डोज कायेधुंकूपिं ८१ प्रतिशतं बुस्टर डोज कायेधुंकूगु धाःगु दु । इंग्ल्यान्डय् थें आः स्कटल्याण्ड, वेल्स व नर्थ आइरल्याण्डय् नं कोरोनाया प्रतिबन्ध चिकेगु तयारी यानाच्वंग दु ।
LEAVE YOUR COMMENTS