अफ्रिकाय् मलेरिया विरुद्धया खोपयात ऐतिहासिक स्वीकृति
एजेन्सी÷ अफ्रिकाय् छगू दशकया कुतः लिपा तयार जूगु मलेरिया विरुद्धया खोपयात स्वीकृति बिउगु दु । अफ्रिकाय् मलेरियां यानाः यक्व मस्त सिनाच्वंगु खः । खोपया स्वीकृति बिइव मलेरिया विरुद्ध अभियानय् थुकियात ऐतिहासिक सफलताकथं काःगु दु । चिकित्सा क्षेत्रया तःधंगु उपलब्धिकथं थ्व खोपया निर्माणयात काःगु दु ।
विश्व स्वास्थ्य संगठनं अफ्रिकाया थीथी देसय् खोपया परीक्षण याःगु खः । अफ्रिकी देय् घाना, केन्या, मालवीं खोपया परीक्षण यायेधुंकाः विश्व स्वास्थ्य संगठनं खोपयात स्वीकृति बिउगु खः । आः थ्व खोप सब साहारा अफ्रिका व मलेरिया संक्रमण दर उच्चनिसें मध्यम खनेदुगु थासय् वितरण याइगु जुइ ।
विश्व स्वास्थ्य संगठनया महानिर्देशक डा. टेड्रोस एड्हानोम गेब्रेयससं थुकियात ऐतिहासिक क्षण धाःगु दु । डा. टेड्रोसं ताः ईया कुतः लिपा मस्तय्त जुइगु मलेरियाविरुद्धया खोप स्वीकृत जूगु धयागु विज्ञान, बाल स्वास्थ्य व मलेरिया नियन्त्रणया निंति उपलब्धी खः धाःगु दु । डा. टेड्रोसं खोपं स्वीकृत जूगुलिं द्वलंद्वः मनूतय्त बचे यायेफइगु नं धाःगु दु ।
अफ्रिकाय् मलेरियां सन् २०१९ य् जक निगू लख व ६०द्वः मस्त सीगु खः ।
LEAVE YOUR COMMENTS