अफगानिस्तानं उद्धार यायेगु ज्याय् अमेरिका अन्तिम चरणय्

एजेन्सी- अफगानिस्तानया राजधानी काबुलय् च्वंगु अन्तर्राष्ट्रिय विमानस्थलय् थानाच्वंपि थःपिनि व विदेशी नागरिकतय् उद्धार यानाच्वंगु अमेरिकाया उद्धार ज्या अन्तिम चरणय् थ्यंगु दु ।

काबुल विमानस्थलय् थानाच्वंपिं थ्यंमथ्यं द्वःछिम्ह सर्वसाधारणया उद्धार लिपा अमेरिकाया अन्तिम चरणया उद्धार क्वचाइ । थ्व धुंकाः विमानस्थलय् दुपिं अमेरिकी सेनां अफगानिस्तान त्वःती । विमानस्थलय् प्यद्वः अमेरिकी सैनिक ल्यंदनि । अमेरिकी राष्ट्रपति जो बाइडेनं अगस्ट ३१ तकया दुने उद्धारया ज्या क्वःचाइगु धाःगु खः । बेलायतया सैनिक, कूटनीतिज्ञ व अधिकारीतय्सं धाःसा अफगानिस्तान त्वःतेधुंकूगु दु ।

थ्वया हे दथुइ अमेरिकी राष्ट्रपति जो बाइडेनं शनिवाः छगू बक्तव्य जारी यानाः काबुल विमानस्थलय् हाकनं हमला जुइफुगु ख्याच्वः बिउगु दु । राष्ट्रपति जो बाइडेनं ३६ घण्टाया दुने मेगु हमला जुइफु धकाः अमेरिकी सेनायात धाःगु खः । बिहिवाः इस्लामिक स्टेट–कें काबुल विमानस्थलय् आत्मघाती हमला याःगु खःसा थुकी लानाः १७० म्ह मनू सीगु खः । अथे हे द्वःछिसिबें अप्वः मनूत घाःपाः जूगु खः ।

विमानस्थलय् जूगु हमलाया लिसलय् अमेरिकां इस्लामिक स्टेट–के च्वनाच्वंगु थासय् ड्रोन हमला याःगु खः । अमेरिकां हमलाय् काबुल विमानस्थल हमलाया प्रमुख योजनाकार सीगु दाबी नं याःगु दु । थुखे तालिबानं धाःसा अमेरिकां इस्लामिक स्टेटयात थःपिनिगु अनुमति बिना हमला याःगु धासें अमेरिकाया निन्दा याःगु दु । अमेरिकां धाःसा शनिवाः पिकाःगु वक्तव्यय् हाकनं इस्लामिक स्टेटयात हमला यायेगु धाःगु दु ।

थुखे तालिबानया प्रबक्ता जबिहुल्लाह मुजाहिदं काबुल विमानस्थलयात तालिबानया नियन्त्रणय् कायेत अमेरिकाया संकेत पियाच्वनागु धाःगु दु । समाचार संस्था रोयटर्सयाकथं तालिबानयाके विमानस्थलया सिस्टम चले याइपिं विशेषज्ञ व इन्जिनियरत दु । प्रबक्ता जबिहुल्लाहं अफगानिस्तानया ३४ प्रान्त मध्ये ३३ प्रान्तया गभर्नर व प्रहरी प्रमुखया नां नं निश्चित जुइधुंकूगु जानकारी बिउगु दु ।