ओलीपथय् एमाले

थौंकन्हय् नेपाल कम्युनिष्ट पार्टी (एमाले)या जिल्ला अधिवेशन जुयाच्वंगु दु । जिल्ला अधिवेशनपाखें फलाना त्यात, फलाना बुत धकाः मदिक्क समाचार वयाच्वंगु दु । जिल्ला अधिवेशनयात एमालेया नेतृत्वं जक मखु एमालें पिने च्वंपिंसं नं तसकं महत्व बियाः स्वयाच्वंगु दु । पार्टीया कार्यकर्तातय्त ला चुनाव हे लगे जुयाच्वंगु दु । एमालेया जिल्ला अधिवेशन क्वचाये धुंकाः प्रदेश अधिवेशन जुइ । प्रदेश अधिवेशनय् ला झन हे एमाले दुने चुनावया माहोल जुइगु अवस्था वइ । एमालेया जिल्ला अधिवेशन जुयाच्वंगुया छुं छुं घटना थन न्ह्यब्वयेगु कुतः यानाच्वना ।

एमाले मकवानपुर जिल्ला इन्चार्ज रामेश्वर रानां २५ पुस सुथय् हे एकलाल श्रेष्ठ अध्यक्ष दुगु कमिटी घोषणा यात । अनं लिपा हे मेम्ह अध्यक्षया उम्मेदवर बद्री लम्सालं थःगु असन्तुष्टी सार्वजनिक रुपं प्वंकादिल । अध्यक्षया प्रत्यासी लम्सालं उम्मेदवार कायम हे दुगु वक्तब्य जारी यात । तर अधिवेशनं वैधानिकता काल ।

अर्घाखाँचीइ अध्यक्षमण्डलया हे प्रस्ताव कथं पिताम्बर भुसाल अध्यक्ष अनुमोदित जुल । उकियात कयाः उपाध्यक्षया आकांक्षी खुबिराम आचार्यं असन्तुष्टी प्वंकाल । सिन्हः तिकाः दयेकूगु जिल्ला कमिटी खारेज मयातले विद्रोह याये धकाः वय्कलं धयादिल । उगु घटनायात कयाः युवा संघया केन्द्रीय सचिव गोविन्द भुसालं पार्टी हे परित्याग यानादिल ।

थ्व निगू जिल्लाया घटना उदाहरण जक खः । अप्वः याना जिल्लाय् सर्वसम्मतिं कमिटी निर्माण धाःसां नं असन्तुष्ट खने दयाच्वंगु दु । एमालेया झिक्वःगु महाधिवेशनय् गुगुं कथंया दृश्य खने दुगु खः अथे हे खने दत जिल्ला अधिवेशनय् । चितवनय् जूगु महाधिवेशनया इलय् मंसिर १२ गते चान्हय् बन्दसत्रय् स्वयं ओलीं केन्द्रीय सदस्यतय्गु नां धलः हे प्रस्तुत यानादिल । तर भीम रावल, घनश्याम भुसालपिंसं अस्वीकार यात । अनं लिपा चुनावय् वन । ओलीया प्रस्ताव कथं हे त्याकल । थुकिया अर्थ अन ओलीं यानादीगु प्रस्तावयात मतदानया माध्यमं औपचारिकता जक बिउगु खत ।

वंगु पुष २३ गतेनिसें शुरु जूगु जिल्ला अधिवेशन एमालेया महाधिवेशनय् थें हे खने दत अप्वः थासय् । अध्यक्ष मण्डलपाखें जिल्लाया नेतृत्वया नां तयार यानाः घोषणा यायेगु अले उकियात हलपाखें अनुमोदन यायेगु अभ्यास जुल । असन्तुष्ट पक्ष अन्ततः म्हुतुइ धौफिना च्वनेत बाध्य जूगु खनेदु । महाधिवेशन क्वचाये धुंकाः नं जिल्लाया अधिवेशनय् खनेदुगु थुगु कथंया दृश्यं एमाले आः गुखेपाखे वनेत्यंगु दु धयागु न्ह्यसः ब्वलनावःगु दु । लोकतान्त्रिक पार्टी, प्रजातान्त्रिक पार्टी अले जनताया पार्टी धाइगु एमाले दुने कार्यकर्ताया हैसियत छु जुया वनाच्वन धकाः नं झन् झन् स्पष्ट जुजुं वनाच्वंगु दु ।

एमालेया झिक्वःगु महाधिवेशन न्ह्यः पार्टीया जिल्ला अधिवेशन नं मयाः, अले प्रदेशया अधिवेशन नं मयाः । वडा अधिवेशन, गाउँपालिका व नगरपालिकाया अधिवेशन जक क्वचायेकाः महाधिवेशनया प्रतिनिधि ल्ययेगु ज्या याःगु खः । अन्ततः महाधिवेशनं पार्टीयात ओलीमय याःगु खँय् सुयां नं निगू मत दइमखु । चितवनया महाधिवेशन क्वचाये धुंकाः जक जिल्ला व प्रदेशया अधिवेशन याःगुयात थीथी कथंया न्ह्यसः ब्वलना वइगु स्वाभाविक हे खः । थीथी जिल्लाय् ओली पक्षयापिं त्याना वल धकाः धायेगु यानाच्वंगु दु । गुलिं गुलिं जिल्लाय् ला एमालेया झिक्वःगु महाधिवेशन न्ह्यः हे पार्टीया कार्यकर्तातय्सं ‘ओली बा’ धकाः न्ववायेगुनिसें नाराबाजी तकं याना वयाच्वंगु हे खः । आः एमालेया झिक्वःगु महाधिवेशन क्वचाये धुंकाः ला एमाले धयागु हे ओली अले ओली धयागु हे एमाले धइगु कथंया मनूतय्सं थुइकाच्वंगु दु ।
महाधिवेशन धुंकाः जिल्ला व प्रदेशया अधिवेशन छाय् ?

सामान्य कथं पार्टीया वडा, पालिका, जिल्ला, प्रदेशया अधिवेशन क्वचाये धुंकाः जक महाधिवेशन जुइमाःगु खः । देय् संघीय संरचनाय् वने धुंकूगु अवस्थाय् संघीयताया मर्म कथं प्रदेशयात छगू तःधंगु आधार दयेकाः महाधिवेशन यायेमाःगु खः तर एमालें अथे मयात । एमाले पार्टीं ला वडा, पालिका व नगरया अधिवेशन यानाः निर्वाचन क्षेत्रया ल्याखं प्रतिनिधि ल्ययाः महाधिवेशन यात । थुकिया तःगू कथंया अर्थ दु । छता देय् संघीयताय् वने धुंकूगु अवस्थाय् नं एमालें प्रदेशयात प्राथमिकता बिउगु मदु । मेता महाधिवेशन यायेगु ज्या हथाहथासं यायेमाःगुलिं प्रदेश व जिल्लाया अधिवेशन लिपा जक याःगु खः । थीथी कारणत दयेफु । अय्नं प्रदेशया अधिवेशन मयासे प्रतिनिधि ल्ययेगु धयागु छगू कथं संघीयताया मोडलयात पूर्ण रुपं स्वीकार मयाःगु जकं मखुला धकाः न्ह्यसः ब्वलनीगु स्वाभाविक हे खः ।

ओलीया उमेरया हद
जिल्ला व प्रदेशया अधिवेशन मयासे महाधिवेशन याःगुया मूल कारण धयागु पार्टी अध्यक्ष केपी शर्मा ओलीयात हे हाकनं अध्यक्षय् हयेगु नितिं हथासं हथासं हे याःगु खः धकाः सकलसिनं थुइका वयाच्वंगु दु । उमेर हदया सवालय् पार्टीया विधानय् तकं संशोधन याःगु खनेदु । पार्टीया विधानय् व्यवस्था जुयाच्वंकथं ७० दँ दुपिं उम्मेदवार जुइमदुगु खःसा ओली नं उम्मेदवार जुइ मदइगु खः । तर महाधिवेशन न्ह्यः विधानयात हिलाः ७० दँय् च्वनाच्वंपिं तक उम्मेदवार जुइ दु धकाः व्यवस्था यात । उकिं यानाः केपी शर्मा ओलीयात ज्याछिंगु जुल । अले ओली पक्षधरपिंसं थुकियात तसकं ध्यानय् तया वन । ओलीया जन्म धइगु २००८ साल फागुन ११ गते खः ।

विधान संशोधन याःसां नं फागुन ११ गते लिपा ला उम्मेदवार जुइ मदइगु अवस्था वल । २०७८ फागुन ११ गते लिपा ला ओली ७१ दँय् च्वनीगु जुल । यदि पार्टीया जिल्ला नापं प्रदेशया अधिवेशन यानाच्वन धाःसा फागुन ११ गते पुले धुंकाः जक झिक्वःगु महाधिवेशन यायेफइगु अवस्था वइ । उकिं ओलीया उमेरया हदयात ध्यानय् तयाः मंसीरय् हे हाथसं झिक्वःगु महाधिवेशन याःगु खः ।

एमाले दुनेया थुगु कथंया घटना नापं विधान तकं संशोधन अले महाधिवेशन लिपा हे जिल्ला व प्रदेशया अधिवेशन याःगुयात आधार कयाः स्वल धाःसा लिपा ११ औं महाधिवेशन नं थुगु हे कथं जुइमखु धकाः धायेफइगु अवस्था मदु । न्ह्यागु हे जूसां आखिर एमाले धइगु ओलीमय जुयाच्वंगु दु । ओलीयात केन्द्रविन्दु दयेकाः न्ह्यानाच्वंगु दु । छगू कथंया ओलीपथ ज्वनाः न्ह्यानाच्वंगु धकाः धायेगु अवस्थाय् सुनां नं निगू मत तइमखु जुइ ।

 

सम्बन्धित बुखँ

LEAVE YOUR COMMENTS