आप्रवासन– आदिबासि नेवाःतय् काल खः

झीथाय् स्वनिगलय् स्वनिगः पिनेयापिं मनूत खुसिबाः वये थें वयाच्वंगु दु । थन आदिबासि नेवाःतय्गु ल्याः न्हय्गू च्यागू लाख जक खः । पिनें वयाच्वपिं धाःसा ५०÷६० लाख थ्यने धुंकल । पिनें वयाः च्वंवयाच्वंगुयात आप्रवासन धाइसा, पिनें वयाच्वंपिंत आप्रावासी धाइ ।

अप्वया वनाच्वंगु आप्रवासनं यानाः स्वनिगलय् यक्व यक्व समस्या पिहां वयाच्वन । दकलय् तःधंगु समस्या ला झी आदिबासि नेवाः जाति हे मदया वनेत्यंगु दु, न्हना वनेत्यंगु दु, सिना वनेत्यंगु दु ।

आदिवासि धयागु छु ?
स्वनिगलय् दकलय् न्हापां च्वंवःपिं, स्वनिगः दयेकूपिं झी नेवाःत खः । अथे जूगुलिं झी नेवाःतय्त स्वनिगःया आदिबासि धाइ । स्वनिगःयात नेवाःतय् आदिभूमी धाइ ।

नेवाः धैपिं सु ?
नेवाः धयापिं मूल रुपं किराँत परिवारया नेपार जाति खः धाइ । थुकी म्येपू, सापू, शाक्य, थकुरी, लिच्छवि, मल्ल, मैथिलत ल्वाकज्यानाच्वंगु दु । नेवाः धयापिं छगू हे हि अथवा नश्लया जाति मखु ।

आदिवासि नेवाःत गुलि दु ?
नेपालय् आदिबासि नेवाःत १४÷१५ लाखति दु । स्वनिगः दुने धाःसा नेवाःतय् ल्याः ७÷८ लाख ति जक दु । वि.सं. २०२० सं स्वनिगलय् आदिबासि नेवाःत ५०% सिबें अप्वः दु । वि.सं. २०६८ या जनगणना कथं स्वनिगलय् आदिबासि नेवाःतय् ल्याः २३% य् कुहां वये धुंकल । आप्रवासित यक्व दुहांवःगुलिं आदिबासि नेवाःतय् ल्याः कम जूवंगु खः ।

आप्रवासन अप्वःगु लाकि राज्य सत्तां अप्वयेकूगु ? आप्रवासन अप्वःगु मखु अप्वयेकूगु खः । स्वनिगलय् जनसंख्या अप्वः जुइधुंकल । स्वनिगः अस्तव्यस्त जुइधुंकल । थन त्वनेगु लः तकं हे मगाये धुंकल । लः धयागु न्हिंन्हिं हे मदयेकं मगाः । तर सरकारं च्यान्हुइ छकः एक घण्टा लः बियाच्वंगु दु । व नं डिप बोरिङया लः बिया च्वंगु खः । डिप बोरिङ यानाः यक्व लः लिकाःगुलिं स्वनिगःया बँ तसकं कमजोर जुइधुंकल । लाजिम्पात लागा २ इन्च भासय् जुइधुंकल । तर सरकारयात छुं हे मतलब मदु । लः त्वने मखंसा मखं, स्वनिगः स्यंसा स्यं, खितुगा थः हुँ यानाः आप्रवासन तच्वयेका च्वंगु दु । आदिबासि नेवाःत अल्पमतय् लाकेत हे थथे यानाच्वंगु खः ।

थौकन्हे स्वनिगलय् भित्री शहरया पिनेयागु वडात गैर आदिवासि नेवाःतसें कब्जा याये धुंकल । आप्रवासन बढे जुयावंलिसे भित्री शहर दुने नं गैरनेवाःतसें हे कब्जा याःवइतिनि । स्वनिगःया जनसंख्या एक करोड थ्यंकाः मेगासिटी दयेकेगु सरकारया योजना दु । स्वनिगःया जनसंख्या एक करोड थ्यनीबलय् आदिवासि नेवाःत ७÷८ प्रतिशतय् कुहां वइतिनि । भित्री शहरया पिने जक मखु दुनेनं, नगरपालिका जक मखु वडा तक नं गैर नेवाःतसें कब्जा याइतिनि । स्थानिय सत्तां तकनं नेवाःतय्त पितिना छ्वेत आप्रवासन तच्वेकाच्वंगु खनेदु । नेवाःत न्हापा हे भाषा, भूमि, प्रशासन, व्यापार व्यवसाय, लजगाः , सेना प्रहरी ख्यलं विस्थापित जुइधुंकल ।

आः स्थानीय सत्तां तक नं पूवंक विस्थापित जुइत्यंगु खनेदु । आदिबासि नेवाःतय्त पहिचान मदुम्ह, हाःनाः मदुम्ह, दास सरहया अवस्थाय् लाकेत्यंगु खनेदु । झिदँ नीदँया खँ खः आदिबासि नेवाः जाति न्हना वनेत्यंगु दु, तनावनेत्यंगु दु, सिना वनेत्यंगु दु । झीसं धायेफु आदिबासि नेवाःत सिना वनेत्यंगु मखु स्यायेत्यंगु खः । राज्यसत्ता न्ह्याका च्वंपि एमाले–माओवादी जानाः दयेकूगु नेपाल कम्युनिष्ट पार्टी (नेकपा), नेपाली कांग्रेसयात झीसं प्रजातन्त्रबादी समाजबादी धायेगु याना च्वना । थ्व भ्रम खः । थुपिं साम्प्रदायिक, जातिबादि, नश्लबादि, ब्राम्हणबादी खः । थुपिं नेवाः विरोधी, नेपालभाषा विरोधी विभेदकारी खः । थुपिं जाति संहार याइपिं हिटलरवादी खः ।

नश्लवादी भ्रष्ट राज्यसत्ताया विकल्प जुजु खःला ?
झी आदिबासि नेवाःतसें नेपाली कांग्रेस, एमाले, माओवादी जक मखु जुजु व राजतन्त्र नं भोगय् याये धुन । थुपिं सकलें नेपालभाषा विरोधी नेवाः विरोधी साम्प्रदायिक नश्लवादी खः । वर्तमान राज्य सत्ताया विकल्प जुजु मखु झी आदिवासि नेवाःत थःहे खः ।

आदिवासि नेवाः जाति म्वाये फइतिनि ला ?
झी नेवाःतसें जिपिं स्वनिगःया आदिबासि खः धाये फत धाःसा, स्वनिगः जिमिगु आदिभूमि खः जिमिके मन्यँसे थन यःयःथे याये दइमखु धाये फत धाःसा आदिबासि नेवाःत म्वाये फइतिनि, आदिभूमि स्वनिगः म्वाके फइतिनि । उलि धाये सःपिं, उलि धाये फुपिं नेवाःत पिहां वयेमाल । त्वाःत्वालय् गांगामय् नेवाःतय् दथुइ आदिबासि नेवाः जागरण अभियान न्ह्याके माल । न्ह्यलं चाःपिं नेवाःत छप्पँ जुइमाल । संगठित नेवाः शक्ति निर्माण जुइमाल ।

संविधानं बियातःगु स्वायत्त क्षेत्रया अधिकार काये माल । संविधानं बियातःगु स्वायत्त क्षेत्रया अधिकार मकासें संविधानं बियामतःगु स्वायत्त राज्यया अधिकार माल धायेगु, व नं म्हुतु छप्वालं जक हाला च्वनेगु गलत खः । गलत नीति ज्वना च्वन धाःसा आदिवासि नेवाः जाति म्वाये फइमखुत । आः झिदँ नीदँया खँ खः आदिबासि नेवाः जाति सीत्यंगु दु । सीत्यंगु मखु स्यायेत्यंगु खः । म्वायेत कुतः यायेगु लाकि आत्मसम्र्पण यायेगु ? नेवाः विरोधी नेपालभाषा विरोधी राजनीतिक दल वा जुजुया ल्यूल्यू वनाः नेवाः जाति म्वाये फइमखुत । विकल्प जुजु मखु झी आदिवासि नेवाः थःपिं हे खः । थःगु लं थःम्हं हे दयेके माल । थःगु लागिं थः हे मत थें च्याये फये माल । ‘अपो दिपो भवः’ ।

सम्बन्धित बुखँ

LEAVE YOUR COMMENTS