देय्या बछि कोरोना संक्रमित स्वनिगलय्

येँ – देय्न्यंकं अप्वया वनाच्वंगु कोरोना संक्रमणया मू केन्द्र स्वनिगः जूगु दु । उकिसनं राजधानी येँ देय् नेपाःया हे दकलय् अप्वः कोरोना संक्रमित दुगु थाय् जूवंगु दु ।
स्वास्थ्य जन जनसंख्या मन्त्रालयं सार्वजनिक याःगु तथ्यांक कथं म्हिगः संक्रमित जूपिनिगु ल्याः नं दकलय् अप्वः स्वनिगलय् हे खनेदुगु खः । म्हिगः येँय् जक १९१३ म्हेसिके कोरोना संक्रमण खने दुगु खः । अथे हे यलय् ३७७ म्ह व ख्वपय् ३१७ म्ह खने दुगु खःसा स्वंगुलिं नगरय् यानाः मुक्कं २६०७ म्हेसित संक्रमण जूगु खने दुगु खः ।

म्हिगः देय्न्यंकं याःबलय् मुक्कं ५,०८७ म्ह न्हूपिं संक्रमित पिहां वःगु खःसा उकी मध्ये बछि स्वयां अप्वः स्वनिगलय् खने दुगु खः ।
थ्व नापं यायेबलय् आः स्वनिगलय् जक सक्रिय संक्रमितया ल्याः १० हजार ८११ म्ह थ्यंगु दु । थ्व धइगु देय्न्यंकं संक्रमित जुयाच्वंपिनि कुल संख्याय् नं बछि स्वयां अप्वः खः ।

स्वास्थ्य तथा जनसंख्या मन्त्रालयया कथं म्हिगः देय्न्यंकं कोरोना भाइरस संक्रमित जूपि ल्याः ५ हजार ८७ म्ह थपे जूगु खः । मुक्कं २० हजार ५६० म्हेसित पीसीआर व एन्टिजेन परीक्षण याःगु इलय् उगु संक्रमण पुष्टि जूगु खः । थ्व लिसें आः देय्न्यंकं कोरोना भाइरस सक्रिय संक्रमितया ल्या १८ हजार २३५ म्ह थ्यंगु दु । वंगु नीप्यघौया दुने ३०६ म्ह विरामीया कोरोना लना वंगु दुसा स्वम्हेसिया ज्यान वंगु दु ।

अथे हे देय्या ७७ गुलिं हे जिल्लाय् कोराना संक्रमित जूगु दुसा न्यासः स्वयां अप्वः सक्रिय संक्रमित दुगु जिल्ला नं खुगू थ्यंगु दु । म्हिगः तक न्यासः स्वयां अप्वः संक्रमित जूगु जिल्ला मध्ये येँ, यल, ख्वप, मोरङ, कास्की व सुनसरी जूगु दुसा निसः स्वयां अप्वः सक्रिय संक्रमित दुगु जिल्ला न्हय्गू थ्यंगु दु । निसः स्वयां अप्वः संक्रमित जूगु जिल्लाय् झापा, चितवन, मकवानपुर, नवलपरासी, बाँके, रुपन्देही व कैलाली जूगु दु ।

स्वनिगः देय्न्यंकं वइपिं मनूत च्वनीगु थाय् जूगु कारणं यानाः थन संक्रमण दर धमाधम हे अप्वया वनीगु खतरा दुगु खँ विज्ञतय्सं धाःगु दु । संक्रमितया ल्याः अप्वया वः थें थौंकन्हय् थनया अस्पतालय् विरामीया चाप नं अप्वयेगु शुरु जूगु खँ धाःगु दु । सरकारं कोरोना नियन्त्रणया लागिं भीडभाड मयायेगु, मेला, भ्वय् आदि मयायेगु, खोपया कार्ड क्यनाः जक निश्चित थासय् दुहां वने दइगु नियम लागू यायेधुंकूगु दु ।

सम्बन्धित बुखँ

LEAVE YOUR COMMENTS