ख्वपया बारे विचाः यानाः जक नवायेत इनाप
ख्वप (नेपालभाषा टाइम्स)÷ ख्वप नगरपालिकाया प्रमुख सुनिल प्रजापतिं ख्वप देय्या बारे विचाः यानाः जक नवायेत इनाप यानादीगु दु ।
छुं ई न्ह्यः ख्वपय् जूगु छगू ज्याझ्वलय् सहरी विकास मन्त्री मेटमणि चौधरीं ख्वप नगरपालिका विरुद्ध नवाःगु खँय् आपत्ति प्वंकादिसें नगर प्रमुख प्रजापतिं मन्त्रीं ख्वप देय्या बारे छुं नं मसिउ, उकिं ख्वपया बारे नवायेत न्हय्क्वः विचाः यानाः नवाःसा उपयुक्त जुइ धयादिल ।
नगर प्रमुख प्रजापतिं उगु खँ इन्द्रायणी बचत तथा ऋण सहकारी संस्थाया १४ क्वःगु साधारण सभाय् धयादीगु खः ।
साधारण सभाया उलेज्या नगर प्रमुख प्रजापतिं जनता हे थ्व देय्या मालिक खः धासें देय्या प्रमुख शासक दलतय्सं प्रजातन्त्रया नामय् स्वेच्छाचारी शासन संचालन यानाः जनतायात न्ह्याब्लें नं क्वत्यलेत स्वयाच्वंगु द्वपं बियादिल ।
वय्कलं सहकारी संस्थातय्सं ख्वप नगर सुचुकुचु याना तयेत सर सफाइ, स्वास्थ्य शिविरलिसें थीथी कथंया जनचेतनामूलक ज्याझ्वः यायेगु नापं थीथी सीपमूलक ज्याझ्वः व तालिम संचालन यायेमाःगु खँय् बः बियादिल । थुकथंया तालिम संचालन यानाः सहकारी संस्थां थः सदस्यतय्त आत्मनिर्भर यायेत उत्साहित यायेमाःगु वय्कःया धापू दु ।
ख्वप नगरपालिका २ वडा अध्यक्ष हरिप्रसाद बासुकलां सहकारी संस्थात सहकारीया हे सिद्धान्तकथं संचालन जूसा बांलाइ धासें समुदायय आधारित संस्थायात जक विश्वास यायेत इनाप यानादिल ।
संस्थाया अध्यक्ष गोपाल श्यामाया सभापतित्वय् जूगु साधारण सभाय् जिल्ला बचत ता ऋण सहकारी संघया कृष्णगोविन्द लाखाजु, शिक्षा विकास साकोसया तुल्सीहरी प्रजापति, डायमण्ड साकोसया प्रतिनिधि लक्ष्मीप्रसाद फाँजुलिसें थीथी सहकारी संस्थाया प्रतिनिधिपिंसं नुगःखँ तयादीगु खः ।
ज्याझ्वलय् असल बचतकर्ता व एसइइलिसें थीथी तगिंया परीक्षाय् उत्तीण जूपिंत नं हनेज्या याःगु खः ।
LEAVE YOUR COMMENTS