राजधानी विवाद अझं अन्यौलय्

समितिया रिपोर्ट वयेधुंकूसां बैठक च्वने मफयाच्वन
येँ – प्रदेश नं. ३ या स्थायी राजधानी गन तयेगु धइगु खँय् अझं सहमति जुइ मफयाच्वंगु मदुनि । थकिया लिच्वः आः प्रदेश सभाया बैठकय् तकं लानाच्वंगु दु ।स्थायी राजधानी सम्भाव्यता अध्ययन विशेष समितिं असोज २२ गते प्रदेशसभाय् थःपिनि प्रतिवेदन लःल्हायेधुंकाःनिसें बैठक च्वने फयाच्वंगु मदु ।

सम्भाव्यता अध्ययन विशेष समितिं स्वनिगःया काभ्रे, ख्वप, चितवन, नुवाकोट व मकवानपुरयात राजधानी दयेके फइगु सुझाव बिउगु खःसां थुकी मध्ये नं विशेष यानाः काभ्रे व मकवानपुरया हेटौंडा दकलय् न्ह्यःने लानाच्वंगु दु । प्रदेश ३ या आपालं सांसदत हेटौंडाय् राजधानी तये मजिउगु पक्षय् दुसा मुख्यमन्त्री डोरमणि पौडेलं धाःसा हेटौंडाय् हे राजधानी तयेमाः धकाः अडान कयाच्वंगु दु ।

बहुमत सांसदतय्सं हेटौंडा राजधानीया निंतिं पायक मजू धासें उकिया विकल्प काभ्रेय् राजधानी तयेमाः धायेगु यानाच्वंगु दु ।थ्वहे झ्वलय् वइगु मंसिर १० गते प्रदेशसभाया बैठक सःतातःगु दु । तर उगु बैठकय् नं राजधानीया बारे खास हे सहलह मजुइगु खँ नां कने चाहे मजूम्ह छम्ह सांसदं ‘नेपालभाषा टाइम्स’ यात कनादिल ।

वय्कलं कनादी कथं निगू स्वंगू विधेयकय् सहलह जूसां राजधानी बारे धाःसा अझं खँ जुइ मखुनि । मेखे राजधानीया विवाद सहमतिं हे क्वःछीगु लागिं मुख्यमन्त्री डोरमणि पौडेल व मन्त्रीतय्सं नेकपाया शीर्ष नेतातलिसें अनौपचारिक सहलह यानाच्वंगु खँ सीदुगु दु । उखे राजधानी क्वःछीगु खँयात अनिश्चित मयायेत सांसदतय्सं सः तयेगु नं शुरु याना हःगु दुसा उकिया लागिं थुमिसं पार्टी दुने लबिङ नं यानाच्वंगु दु ।

मेखे सभामुख सानुकुमार श्रेष्ठं धाःसा तत्काल राजधानी बारे विधेयक वइगु सम्भावना म्हो जक दुगु खँ कनादीगु दु । वय्कलं ‘नेपालभाषा टाइम्स’ लिसें खँ ल्हासें राजनीतिक पार्टीतय् दथुइ सहलह तकं मजूनिगु जूगुलिं तत्काल प्रदेशया राजधानी सम्बन्धी विधेयक वइगु सम्भावना मदुगु जानकारी नं बियादिल ।

आः च्वनीगु बैठकय् छन्हुं हे प्यंगू विधेयक वइगु खँ कनादिसें सभासद् श्रेष्ठं प्रदेश राजधानीया विधेयक राजनीतिक सहमति लिपा जक वइगु जानकारी नं बियादिल । प्रदेशया राजधानीया विवाद नेकपाया शीर्ष नेतातय्सं नं क्वःछी मफयाच्वंगु खँ सीदुगु दु । विशेष यानाः नेकपाया अध्यक्ष लिसें प्रधानमन्त्री केपी ओली शर्मा राजधानी काभ्रेय् तयेगु पक्षय् दुसा नेकपाया मेम्ह अध्यक्ष पुष्पकमल दाहाल धाःसा राजधानी हेटौंडाय् तयेमाःगु पक्षय् दी ।