इयुया २१ खर्बया बजेट पारित

एजेन्सी – युरोपेली संघया नेतातय्सं प्यन्हुयंकंया विवाद व बहस लिपा २१ खर्ब डलर बजेटय् सहमति प्वंकूगु दु। थ्व बजेटया लिसें कोरोना भाइरसया कारणं संकटय् लानाच्वंगु अर्थतन्त्र थकायेत तयार याःगु आर्थिक पुनरुत्थान प्याकेज नं पारित जूगु दु ।

युरापेली संघलिसे आवद्ध २७ गू देय्या सरकार प्रमुखत सहभागी ब्रसेल्स शिखर बैठकं कोरोना भाइरसया कारणं ब्वलंगु स्वास्थ्य व आथिृक पक्षय् व्यापक चर्चा व विचारविमर्श याःगु खः । युरोपेली परिषदं तयार याःगु ७ खर्ब ५० अर्ब युरोया छगू आर्थिक ग्वाहालि प्याकेज बैठकं अनुमोदन याःगु खः । विशेष यानाः कोरोना भाइरसपाखें दकलय् अप्वः प्रभावित देय्तय्त उगु ध्यबा अनुदान व त्यासा कथं उपलब्ध याकी ।

फ्रान्सेली राष्ट्रपति इमानुएल म्याँक्रों शिखर बैठकय् जूगु सहमति ऐतिहासिक जूगु धासें राहत प्याकेजय् दुथ्याःगु अनुदान व त्यासां युरोपेली देय्दथुइ ऐक्यवद्धतायात अझ बल्लाकेत ग्वाहालि याइगु खँ धयादिल । जर्मन चान्सलर एन्जेला मर्केलं शिखर बैठकं वइगु न्हय् दँया निंतिं युरोपेली संघया आर्थिक आधार तयार यायेत ताःलाःगु बिचाः प्वंकादिल । युरोपेली संघया परम्परागत रुपं हे दकलय् शक्तिशाली व प्रभावशाली देय्त जर्मनी व फ्रान्सं थ्व पालय् नं मध्यस्थता वार्ताय् निर्णायक भूमिका म्हितूगु खः ।

युरोपेली संघया छुं देय्तय्सं प्रस्तावित आर्थिक पुनरुत्थान प्याकेजय् क्यंगु सरोकारय् नं थुपिं देय्तय्सं समाधान यानाः थःगु उपस्थिति बल्लाक क्यंगु खः । युरोपेली संघ आयोगया अध्यक्ष उर्सुला भोन डर लियेनं युरोपेली देय्तय् आर्थिक पुनरुत्थानया निंतिं थ्व तसकं सकारात्मक प्रस्ताव पारित जूगु खँ धयादीगु दु। नेदरल्यान्डया प्रधानमन्त्रीया नेतृत्वय् छुं युरोपेली देय् तय्सं प्रस्तावित राहत प्याकेजय् अनुदानया रकम अप्वः तःगु धासें आपत्ति प्वंकूगु खः ।

उमिसं दकलय् अप्वः राहत काइगु सम्भावना दुगु स्पेन व इटालीं आर्थिक सुधारया कार्यक्रम न्ह्यःने हयेमाःगु धासें अज्याःगु राष्ट्रयात अप्वः नगद अनुदान बीगु उपयुक्त मजूगु खँ धाःगु खः । फ्रान्सेली राष्ट्रपति म्यांक्रों थ्व पालय् बैठकय् तसकं तनावपूर्ण क्षण ब्वलंगु खँ धयादीगु दु ।