कांग्रेस येँ महानगरय् नीलकाजी
येँ (नेपालभाषा टाइम्स)÷ नेपाली कांग्रेस येँ महानगर समितिया सभापतिइ नीलकाजी शाक्य निर्वाचित जुयादीगु दु । वंगु आइतवाः जूगु मतदानय् सभापतिइ निर्वाचित शाक्यं थः निकटतम प्रतिद्वन्द्वी प्रगतिमान रंजितयात तःधंगु मत अन्तरं बुकादीगु खः ।
येँ महानगरपालिका २५ वडाअध्यक्ष तकं जुयाच्वनादीम्ह शाक्यं प्रकाशमान सिंह गगन थापा प्यानलपाखें उम्मेदवारी बियादीगु खः । शाक्यं निर्वाचनय् ७८६ मत प्राप्त यानादीगु खःसा संस्थापन समूहया रंजितं ३२९ मत प्राप्त यानादीगु खः ।
सभापतिइ निर्वाचित शाक्य प्यानलसहित निर्वाचित जुयादीगु खः । शाक्यया प्यानलं उम्मेदवारी बियादीपिं सन्तकुमार महर्जन व सुशीला ढकाल उपसभापति, सुसन वैद्य व पुरुषोत्तम खकुरेल सचिव, विमला लामिछाने व अमृत मानन्धर सचिवय् विजयी जुयादीगु दु ।
सभापतिइ पराजित रंजित प्रतिनिधिसभा सदस्य भीमसेनदास प्रधानलिसे सतीम्ह खःसा वय्कःयात पार्टी सभापति शेरबहादुर देउवा व पुलांम्ह महामन्त्री कृष्णप्रसाद सिटौलाया नं समर्थन दुगु खः ।
निर्वाचनय् दकलय् अप्वः मत सुसन वैद्यं कयादीगु खः । सहसचिवय् निर्वाचित वैद्यं ८५३ मत प्राप्त यानादीगु खः ।
शाक्यलिसें निर्वाचित सकलें अत्याधिक बहुमतं निर्वाचित जुयादीगु खः ।
LEAVE YOUR COMMENTS