कमल पुखूया सिन्हः तिना वंपिंत लःया फोहरा

येँ -कामपा वडा १ य् निर्माण जुयाच्वंगु कमल पुखूया चायागु सिन्हः तिनाः वालुवाटारपाखे मार्च पास याःपिं नागरिक आन्दोलनया कार्यकर्तातय्त प्रहरीं लःया फोहरां छ्वाकाः तितरबितर याना बिउगु दु ।

ओली सरकारं संसद विघटन याःगु संवैधानिक मजुल धइगु माग ज्वनाः मार्च पास याःपिं कार्यकर्तातय्सं वालुवाटारया निषेधित क्षेत्र पार यायेत स्वयेवं प्रहरीं लःया फोहरां छ्वाकाः तितरबितर याना बिउगु खः ।

शान्तिपूर्ण विरोध प्रदर्शनया ज्याझ्वलय् प्रहरीं हस्तक्षेप याःगु धासें आक्रोशित जूपिं अभियन्तातय्सं आः देशय् स्वक्वःगु जनआन्दोलन शुरु जुल धकाः घोषणा याःगु दु । न्हापांगु जनआन्दोलनं पञ्चायत व्यवस्था वांछ्वःगु खःसा निक्वःगु जनआन्दोलनं राजतन्त्र वांछ्वःगु खः । आः ओली सरकार वांछ्वयेत स्वक्वःगु जनआन्दोलन शुरु जूगु घोषणा उमिसं याःगु खः । प्रहरीं म्हिगः याःगु हस्तक्षेप लिपा आः नागरिक आन्दोलन अझ तच्वयेका यंकेगु ख्याच्वः नं उमिसं बिउगु दु ।

थ्वहे झ्वलय् प्रधानमन्त्री केपी ओलीं थौंकन्हय् बीगु भाषणय् छ्यलाच्वंगु भाषा व थीथी ख्यःया मनूतय्त बीगु यानाच्वंगु ध्याचूयात कयाः नं आलोचना जूगु दु । प्रम ओलीं संसद पुनस्र्थापना यायेमाः धाइपिं सकलें देशद्रोही खः धकाः बियादीगु अभिव्यक्तियात कयाः नेपाली कांग्रेस नं आक्रोशित जूगु दु । थ्व अभिव्यक्तिया कारणं ओली तानाशाही जूगु द्वपं समेत कांग्रेसं बिउगु दु ।

अथे हे ९४ दँ दुम्ह वरिष्ठतम् अधिवक्ता कृष्णप्रसाद भण्डारीं थःत प्रधानमन्त्री केपी ओलीं तमासा यायेत जक सर्वोच्च अदालतय् बहस याःवःम्ह धकाः बिउगु अभिव्यक्ति पाय्छि खः लाकि मखु धकाः इजलासयाके न्ह्यसः न्यनादीगु दु । प्रम ओलीं वरिष्ठ अधिवक्ता भण्डारीयात ‘बाज्या वकिलया तमासा’ धकाः ध्याचू नकादीगु खः ।