पत्रकार महासंघया हलय् सत्यनारायण बहादुर श्रेष्ठया बुन्हि

येँ-नेपाल पत्रकार संघया संस्थापक अध्यक्ष सत्यनारायण बहादुर श्रेष्ठया १०६ दँ बुन्हि म्हिगः न्यायेकल । नेवाः पत्रकार राष्ट्रिय दबूया ग्वसालय् नेपाल पत्रकार महासंघया हलय् उगु ज्याझ्वः जूगु खः ।

ज्याझ्वलय् न्ववासें प्रेस काउन्सिल नेपालया अध्यक्ष बालकृष्ण बस्नेतं सत्य नारायण श्रेष्ठयात पत्रकार महासंघया संस्थापक अध्यक्षया मान्यता बीकेगु ज्याय् काउन्सिलपाखें माःगु ग्वाहालि यायेगु बचं बियादिल । आदिवासी जनजाति पत्रकार महासंघया न्वकु गजुरधन राईं इतिहासयात सुधार यायेगु ज्याय् पत्रकार महासंघ लिचिले मजिउ धयादिल ।

मधेसी पत्रकार समाजया नायः मोहन सिंहं पत्रकार महासंघया हलय् जुयाच्वंगु ज्याझ्वलय् महासंघया पदाधिकारीतय्सं ब्वति मकाःगु खँय् आक्रोस प्वंकादिल । पत्रकार दबूया सल्लाहकार सुरेश किरणं झीसं इतिहासया कदर मयाःसा झीत नं कन्हय् सुनानं कदर याइ मखु धयादिल ।

नेवाः पत्रकार राष्ट्रिय दबूया नायः सुरजवीर वज्राचार्यया सभापतित्वय् जूगु ज्याझ्वलय् सत्यनारायण बहादुर श्रेष्ठया म्ह्याय् सुजिता मानन्धरं नं न्ववानादीगु खः ।