धेंधेंबल्लाः जूसा कुलमानं ब्वति मकाइगु

येँ (नेपालभाषा टाइम्स) – विद्युत प्राधिकरणया निवर्तमान कार्यकारी निर्देशक कुलमान घिसिङ प्राधिकरणय् कार्यकारी निर्देशक ल्ययेगु निंतिं धेंधेंबल्लाः जुल धाःसा थःम्हं अज्याःगु धेंधेंबल्लाखय् ब्वति मकायेगु संकेत बियादीगु दु ।

बीबीसी नेपाली सेवा लिसे खँ ल्हासें वय्कलं सरकारं धयादीगु दु, ‘जिं जिगु कार्यकालय् यानागु ज्यां हे लिच्वः क्यनेधुंकल, उकिं आः जिं जिगु निंतिं हाकनं प्रतिस्पर्धा यानाच्वनेमाः थें मच्वं, उकिं सरकारया प्रक्रिया सरकारं हे याइ ।’

तर सरकारं हे पुनर्नियुक्ति यात धाःसा थः हाकनं ज्या यायेत तयार दुगु खँ नं वय्कलं धयादिल । ‘जिगु क्षमता, उमेर, अनुभव व जनतां विश्वास याःगु ल्याखँ ज्या यायेफइ धयागु ल्याखं सरकारं छुं नं जिम्मेवारी बिल धाःसा जि व निर्वाह यायेत तयार दु’ वय्कलं धयादीगु दु ।

थ्व झ्वलय् वय्कलं विद्युत प्राधिकरणं थःगु बहिर्गमन स्वाभाविक कथं कायेमाः धासें धयादीगु, ‘निरन्तरता बीगु वा नेतृत्व हिलेगु धयागु खँ पूवंक सरकारयागु खः । छम्ह हे मनू छथाय् हे न्ह्याबलें च्वनाच्वनेमाः धयागु मान्यता जिगु मदु।’