प्रदेश २ या नां ‘मधेश प्रदेश’

येँ -संघीय व्यवस्था अन्तर्गत गठन जूगु नेपाःया न्हय्गू प्रदेशत मध्ये न्हापांखुसी छगू प्रदेशया नां पहिचानया आधारय् तयेत सफल जूगु दु । प्रदेश नं. २ या नां ‘मधेस प्रदेश’ तयेगु निर्णय म्हिगः जूगु दु ।

म्हिगः २ नं. प्रदेश सभाय् नां व स्थायी राजधानीया लागिं जूगु मतदानं स्थायी राजधानी जनकपुरधामय् तयेगु निर्णय नं याःगु खः ।
प्रदेशया नां ‘मधेश’ तयेगु धकाः प्रदेशसभाय् वःगु प्रस्ताव निगू तिहाइ स्वयां अप्वः मतं स्वीकृत जूगु खः ।
संविधान कथं प्रदेशया नां व स्थायी राजधानी क्वःछीत प्रदेशसभाया निगू तिहाइ बहुमत माः । ‘मधेश प्रदेश’या पक्षय् जूगु मतदानय् ९९ म्ह सांसद उपस्थित जूगु खःसा प्रस्तावया पक्षय् ८० मत वःगु खः । दुई तिहाइ बहुमत वयेवं सभामुख सरोजकुमार यादवं प्रदेशया नां ‘मधेश’ तयेगु प्रस्ताव पारित जूगु घोषणा यानादीगु खः ।

प्रदेशया नां ‘मधेश’ तयेत जनता समाजवादी पार्टी, लोकतान्त्रिक समाजवादी पार्टी व माओवादी केन्द्रं मंकाः प्रस्ताव दर्ता याःगु खःसा ‘जानकी’ नां तयेत नेकपा एमाले व नेकपा (एसं) प्रस्ताव याःगु खः । उकथं हे नेपाली कांग्रेसं ‘मिथिला–भोजपुरा’ प्रस्ताव याःगु खःसा बारा पर्साया सांसदतय्संं ‘मध्य मधेश’ नां प्रस्ताव याःगु खः ।

दत्याः न्ह्यः प्रदेशया नां व प्रदेशया स्थायी राजधानी तोके यायेगु लागिं मतदान जूगु खःसा निगुलिं प्रस्तावय् निगू तिहाइ मत मवःगुलिं अस्वीकृत जूगु खः ।

प्रदेश २ या म्हिगः च्वंगु बैठकं धाःसा जनपुरधामयात प्रदेशया राजधानी तोके याःगु दु । प्रदेशसभाय् उपस्थित ९९ सांसद मध्ये जनकपुरया पक्षय् ७८ मत वंगु खःसा मेपिं सांसदत अनुपस्थित जूगु खः । मतदान लिपा सभामुख सरोज यादवं प्रदेश २ या राजधानी जनकपुरधाम घोषणा यानादीगु खः । थुकिया लिसें ताः इलंनिसें थाति लानाच्वंगु राजधानी गन तयेगु धइगु खँ क्वःजिउगु दु । स्थायी राजधानी जनकपुरय् तयेत फुक्कं दलया मंकाः प्रस्ताव दुसां बारा–पर्साया फुक्क दलया सांसदतय्सं धाःसा बिस्कं प्रस्ताव न्ह्यःने हसें वीरगन्जयात स्थायी राजधानी दयेकेत माग याःगु खः ।

प्रदेश २ या नां ‘मधेश’ तयेमाः धइगु माग मूलतः पहिचानवादीतय्गु खः । देय्या छुं हे प्रदेशया नां पहिचानया आधारय् तये मखंसां २ नम्बर प्रदेशया नां पहिचानया आधारय् तयेफुगु दु ।

सम्बन्धित बुखँ

LEAVE YOUR COMMENTS