नेवाः देय् दबू व अखिल भारतीय नेवार संगठन दथुइ समझदारीपत्रय् हस्ताक्षर
येँ (नेपालभाषा टाइम्स)- नेवाः देय् दबू व अखिल भारतीय नेवार संगठन दथुइ नेवाः जातिया भाषा, कला, संस्कृति, नसात्वँसा, लवःकवः, नखःचखः सम्बन्धी अध्ययन अनुसन्धान व सांस्कृतिक सहकार्यया निंतिं झिगू बुँदाया समझदारी पत्रय् ल्हाःचिं तःगु दु । समझदारी पत्रय् नेवाः देय् दबूया नायः पवित्र बज्राचार्य व अखिल भारतीय नेवार संगठनया नायः सूर्य नारायण श्रेष्ठं ल्हाचिं तःगु खः । निगू संगठनया मंकाः ग्वसालय् झापाया बिर्तामोडय् जूगु वंगु आइतवाः जूगु अन्तक्र्रिया ज्याझ्वलय् थुगु समझदारी पत्रय् नं ल्हाचिं तःगु खः ।
निगूलिं संगठनया नायःपिंसं त्वाःदेवाय् मत च्याकाः उलेज्या जूगु ज्याझ्वलय् नेवाः देय् दबू अन्तर्राष्ट्रिय विभागया कजि दिनेश शाक्यं लसकुस न्वचु व दबूया बरिष्ठ न्वकु चन्द्रलाल राजभण्डारीं सुभाय् न्वचु तयादीगु खः ।
ज्याझ्वलय् नेपाः देशय् नेवाःतय्गु अवस्थायात कयाः नेवाः देय् दबूपाखें न्वकु उमेश स्थापितं व भारतय् नेवाःतय्गु अवस्थाया बारे अखिल भारतीय नेवार संगठनया महासचिव श्याम प्रधानं कार्यपत्र न्ह्यब्वयादीगु खः । कार्यपत्रय् निगुलिं देसं ब्वति काःपिसं टिप्पणी यानादीगु खः । ज्याझ्वः दबूया महासचिब सत्यनारायण डंगोलं न्ह्याकादीगु खः ।
ज्याझ्वलय् निगू संगठनया नायःपिंसं निदँ स्वदँ न्ह्यःनिसेंया निरन्तर सहलह समझदारी पत्रय् हस्ताक्षर यायेगु सम्भव जूगु खँ न्ह्यथँसें थुकिं निगुलिं देय्या नेवाः समुदाययात सामाजिक व सांस्कृतिकरुपं लाभ जुइगु विश्वास प्वंकादिल । निगू संगठनया दथुइ तःकेहेँया स्वापू क्वातुकेगु इच्छां प्रेरित जुयाः निगू संगठनं प्रतिनिधित्व यानाच्वंगु नेपाः व भारतया नेवाः समुदायया सांस्कृतिक आदानप्रदान व सहकार्यया चाहनायात थुइकाः, आदिवासी अधिकार सम्बन्धी संयुक्त राष्ट्र संघया घोषणा पत्र व अमूर्त सम्पदा सम्बन्धी अन्तराष्ट्रिय अभिसन्धी आदिवासी समुदायया थवंथःया परम्परागत सम्बन्धयात राष्ट्रिय अन्तर्राष्ट्रिय राजनीतिक प्रशासनिक सीमानां पनेमदइगु प्रावधानया लिधंसा कयाः निगू देय्या नेवाः समुदायया ऐतिहासिक, पुरातात्विक, सामाजिक, सांस्कृतिक विषयवस्तुया अध्ययन अनुसन्धानया आवश्यकता बोध यानाः समझदारी पत्रय् ल्हाःचिं तयाःगु दु धैगु खँ उगु पती न्ह्यथनातःगु दु । समझदारी पत्रय् ज्ञान शिप, भाषा, लिपि, भेषभुषा, नसात्वँसा, संस्कार, सभ्यता व संस्कृति थपूया निंतिं सांस्कृतिक आदानप्रदान, प्रशिक्षण÷तालिम यायेगु, छगू देय्या नेवाःयात मेगु देसय् आवश्यक जुइगु सामाजिक, सांस्कृतिक, शैक्षिक व प्रशासनिक ग्वाहालिइ भूमिका म्हितेगु नापं मंकाः ग्वसालय् अन्तर्राष्ट्रिय कार्यशाला गोष्ठि यायेगु लगायत १० बुँदा न्ह्यथनातःगु दु ।
LEAVE YOUR COMMENTS