नेपाः पासा पुचः अमेरिकाय्या न्हूदँ हना

येँ (नेपालभाषा टाइम्स)- नेपाः पासा पुचः अमेरिकाय् (एनपिपिएं) नेपाल संवत् न्हूदँया भिंतुना ज्याझ्वः व थःगु स्थापनाया ३२ दँ उत्सव तःजिक हंगु दु । वंगु शनिवाः मेरिल्यान्डया गेथर्सबर्गय् जूगु ३२ क्वःगु दँमुँज्यां मनोहर श्रेष्ठया अध्यक्षताय् न्हूगु कार्यसमिति नं ल्यःगु दु । भाजु श्रेष्ठ निक्वःगुखुसी एनपिपिएया अध्यक्ष जुयादीगु खः ।

थुगु न्हूदँया लसताय् जूगु ज्याझ्वलय् न्हापांखुसी शंखधरया मूर्ति नं न्ह्यब्वःगु खः । थ्वयां न्ह्यः शंखधरया किपाय् स्वांमाः देछायेगु याना वयाच्वंगु खःसा थुगुसी निसें शंखधरया मूर्तिइ स्वांमाः देछासें ज्याझ्वः न्ह्याकूगु खः ।

गणेद्यःयात पुज्यानाः शुरु याःगु ज्याझ्वलय् अमेरिकाय् च्वनाच्वंपिं निगूगु पुस्ताया मस्तय्सं नेपाःया राष्ट्रिय म्ये व अमेरिकाया राष्ट्रिय म्ये न्यंकूगु खः । ज्याझ्वलय् लाखे प्याखं, धिमे बाजं, बाँसुरी न्ह्यब्वःगु खः । अथेहे ज्याझ्वलय् एनपिपिएपाखें पिथना वयाच्वंगु दबू पत्रिकाया न्हूगु ल्याः विमोचन नं जूगु खः ।

अध्यक्ष श्रेष्ठं लसकुस यानादीगु ज्याझ्वलय् मू वक्ता कविना सिंहं शंखधर साख्वाः व नेपाल संवत् बारे न्ववानादीगु खः । अथेहे न्हापांम्ह उपाध्यक्ष शान्ति श्रेष्ठं सुभाय् देछायादीगु खः । ज्याझ्वः न्ह्यः समयबजि व ज्याझ्वः क्वचायेकाः बहनी नेवाः झ्वः भ्वय् नकूगु खः ।

ज्याझ्वलय् कविना सिंहं कुमारी चर्या प्याखं, भिंतुना म्ये व यज्ञमान शाक्यं निर्देशन यानादीगु कौडा प्याखं न्ह्यब्वःगु खः । अथेहे डा. अनिल सुवाल व वया कायनं गिटार व बासुरी, युमन श्रेष्ठं याकः म्येँ न्ह्यब्वःगु खः । ज्याझ्वलय् नेपाली पाठशालाया विद्यार्थीपिंसं हुलाप्याखं, अनुज शाक्यं गिटार, सगुन ताम्राकारं म्ये न्ह्यब्वःगु खः । ज्याझ्वःया अन्तय् डिसि क्षेत्रय् लोकंह्वाmगु पासा ब्याण्डं थःगु सांगीतिक प्रस्तुति बिउगु खः । ज्याझ्वलय् चिट्ठा चायेकेगु, आजीवन जःपिंत प्रमाणपत्र लःल्हायेगु ज्या नं जूगु खः ।

एनपिपिएया न्हूगु कार्यसमितिइ मनोहर श्रेष्ठया नेतृत्व शान्ति श्रेष्ठ न्हापांम्ह उपाध्यक्ष, एलन महर्जन उपाध्यक्ष, सुमन तुलाधर महासचिव, रोहिना श्रेष्ठ कोषाध्यक्ष, समिप श्रेष्ठ सचिव व सगुन ताम्राकार उपकोषाध्यक्ष निर्वाचित जूगु खः । अथेहे डा. राजु तमोट, निति माथेमा, रमिता महर्जन व जयस्वोर श्रेष्ठयात मनोनयन याःगु दु ।

अथेहे प्रबन्धकपिं प्रविन ताम्राकार, अनघ श्रेष्ठ व सन्ध्या महर्जनंयात नं हाकनं मनोनित याःगु दुसा कार्यसमिति दुजलय् कञ्चन ख्वाउँजु, रुशन डंगोल व सविना श्रेष्ठ सुवाल मनोनित जूगु दु ।

 

सम्बन्धित बुखँ

LEAVE YOUR COMMENTS