केबिएस लुभुया न्हूगु म्युजिक भिडियो

यल(नेपालभाषा टाइम्स)- केबिएस लुभु स्टुडियोपाखें निर्माण जूगु नेपालभाषाया न्हूगु म्युजिक भिडियो ‘छंगु दुःख स्वस्वं’या पितब्वज्या याःगु दु । वंगु शुक्रवाः तुलसि कम्प्लेक्स लुभुइ छगू ज्याझ्वः यासें उगु म्युजिक भिडियोया पितब्वज्या याःगु खः ।

नांजाःम्ह ध्वनिविद् दीप तुलाधर मूपाहांकथं झायादीगु ज्याझ्वलय् वय्कलं म्युजिक भिडियोया पितब्वज्यालिसें कलाकार व प्राविधिकपिंत मतिनाया चिं व सुभाय् पौ लःल्हानादीगु खः । नेवाः सुपरस्टार रोजिना सुवालया मू भूमिका दुगु म्युजिक भिडियोय् कृष्ण श्रेष्ठ, राजाराम तण्डुकार, जयलक्ष्मी सिद्धि वज्राचार्य, सत्य नेम्कुल, सपना श्रेष्ठ, रहिस महर्जनं नं अभिनय यानादीगु दु ।

म्युजिक भिडियोया निर्माण नियन्त्रक व परिकल्पनाकार केबिएस लुभु खःसा छाँयाकन व सम्पादन शैलेश श्रेष्ठं यानादीगु खः निर्देशन पवन जोशीं यानादीगु खः ।

पवन जोशीं च्वयादीगु म्येँय् सरिता शाही व कृष्ण महर्जनया सः दुथ्यानाच्वंगु दुसा अनिल तुलाधरं लसय् हनादीगु खः ।