‘नःलि’या नातिवज्र विशेषांक विमोचन

येँ(नेपालभाषा टाइम्स) । नेपाल– भाषाया नांजाःम्ह कवि नातिवज्र वज्राचार्ययात देछा कथं वय्कःया विषयय् थीथी च्वमिपिंसं च्वयादीगु च्वसु मुंकाः नःलि साहित्यिक लय्पौया विशेष ल्याः पिथंगु दु । सनिवाः निगू ल्याः कथं पिथंगु उगु विशेषांक छगू ज्याझ्वःया दथुइ नेपालभाषाया उपन्यासकार मथुरा साय्मिं विमोचन यानादिल ।
नातिबज्रया हे छेँ दगू बहालय् जूगु ज्याझ्वलय् मूपाहां साय्मिं नेपालभाषा आन्दोलनया न्ह्यलुवा व भाषासेवाय् समर्पित ब्यक्तित्वया हनाय् थुगु ल्याः पिदंगु कनादिल ।

ज्याझ्वलय् नःलि साहित्यिक लय्पौ व थीथी ब्यक्तिपाखें वयकःयात हनेज्या नं जूगु खः । सम्मानित ब्यक्तित्व नातिबज्र बज्राचार्यं २०२२ सालया आन्दोलनं हे थःत थुगु थासय् थ्यंकूगु खः धयादिसें थम्हं स्कुल वने मफुसां सफू मियाः मियाः हे विद्या आर्जन यानागु खँ कनादिल ।

नःलि लय्पौया सम्पादक नरेशवीर शाक्यया सभापतित्वय् जूगु नातिबज्रया विशेषांक विमोचन ज्याझ्वलय् च्वमि माकिण उराय्या सफू ‘द्वहलपा’ यात रमा कर्णजितं खस नेपाली भासं अनुवाद यानादीगु सफू ‘उपहार’नं मू पाहांपाखें विमोचन जूगु खः ।

ज्याझ्वलय् नेवाः अर्गनाइजेशन अफ अमेरिका नेपाल च्याप्टरया संयोजक लिसें नेपालभाषा एमए विद्यार्थीतय् संस्था ‘लुमंति दबू’ या नायः किरणकेन रंजितं नं न्ववानादीगु खः ।