ने. सं. ११४६ अनलागा अष्टमी -

फोहोर ल्ह्यइगु गाडी तोडफोड, ठेकेदारतय्सं तोडफोड याकूगु शंका

येँ (नेपालभाषा टाइम्स)÷येँया फोहोर ज्वनाः वनाच्वंगु येँ महानगरपालिकाया गाडीयात बञ्चरेडाँडा ल्याण्डफिल साइटय् तोडफोड याना बिउगु दु । उगु तोडफोडय् लानाः महानगरपालिकाया १४ गः गाडी क्षति जूगु खँ धाःगु दु । उकी मनपाया निगः डोजर, छगः एस्काभेटर व १२ गः ट्रक क्षति जूगु खः ।

सोमवाः फोहोर तया यंकूगु खःसां अन फोहोर वाये मखनाः पार्किङ याना तःगु १२ गः ट्रकय् सोमवाः हे बहनी ९ बजेपाखे वःपिं अज्ञात मनूतय्गु पुचलं अप्पां कयेकाः न्हाय्कं तछ्यायेगु लिसें डोजर चले याये मजीक स्यंका तःगु खँ धाःगु दु ।

अन वायेधुंकूगु फोहोरयात मुनाः हानं मेथाय् सारे यायेगु लागिं मनपां अन डोजर यंकातःगु खः । ज्या यायेमाःगु साधन तोडफोड याःगु कारणं आः ज्या याये मफुगुलिं येँया फोहोर मुनेगु ज्या म्हिगःनिसें हानं बन्द जूगु दु । गाडी तोडफोड जुइवं अन प्रहरी वनाः मुचुल्का उठे याःगु दु ।

थःपिनि गाडी तोडफोड याःपिं सु खः धइगु खँ आः तक पत्ता लगे मजूनिगु खँ मनपां धाःगु दु । गाडी स्थानीय मनू–तय्सं तोडफोड याःगु धाःसां थुकी फुक्क स्थानीय मनूतय् ल्हाः मदुगु खँ मनपा प्रमुखया सचिवालय दुजः इन्जिनीयर सुनिल लम्सालं कनादीगु दु ।

मनपाया गाडी तोडफोड यायेगु ज्याय् मनपालिसे ठेक्कापट्टा याये चाहे जूपिं छुं ठेकेदारतय्गु ल्हाः दयेमाः धइगु अनुमान याःगु दु । मनपां अन ज्या याइबलय् माःगु ल्वहंया व्यापार याये चाहे जुयाच्वंपिं ठेकेदारत लिसें अन हे थःपिनि मल कारखाना सञ्चालन याये चाहे जुयाच्वंपिं मनूतय्सं मनपायात दबाब बीगु लागिं थ्व ज्या याःगु अनुमान याःगु दु ।

वंगु छुं न्हि न्ह्यवंनिसें बञ्चरेडाँडाया स्थानीय मनूतय्सं नं थःपिंलिसे जूगु सम्झौताया बांलाक पालना मयाः धासें येँया फोहोर वायेके मबीगु धकाः घोषणा याःगु खः । स्थानीय जनतां अन फोहोर वाके मबीगु धकाः घोषणा हे याःसां मनपां धाःसा जबर्जस्ती फोहोर वायेगु ज्या यानाच्वंगु खः ।

अन फोहोर वायेगु थाय् तक वनेगु लँ सरकारं दयेका बी माःगु खःसां मदयेकूगु कारणं तसकं ध्याचः जुयाच्वंगु दुसा मनपां उगु लँ मर्मतयात ध्यान बियाः ज्या यानाच्वंगु खँ धाःगु दु ।