राप्रपाय् थापायात चीकाः ज्ञानेन्द्रं छु संकेत बिउगु खः ?
येँ -राप्रपाया म्हिगः क्वचाःगु चुनावय् पराजित जुइवं निवर्तमान नायः कमल थापां उकिया दोष पुलांम्ह जुजु ज्ञानेन्द्र शाहयात बियादीगु दु । थापां म्हिगः हे सार्वजनिक सञ्जालपाखें लगातार स्वंगू ट्विट यासें राप्रपा नेपालया चुनावय् निर्मल निवासं नांगां हस्तक्षेप याःगु धासें उकिया भत्र्सना यानादीगु खः ।
वय्कलं यानादीगु न्हापांगु ट्विटय् राप्रपाया चुनावय् वःगु लिच्वःयात थम्हं स्वीकार याये धासें नवनिर्वाचित नायः राजेन्द्र लिङदेनयात भिंतुना बियादीगु दु । लिसें वय्कलं थःत समर्थन यासें भोट बिउपिं कार्यकर्तातय्त सुभाय् नं बियादीगु दु । वयां लिपा याःगु ट्विटय् पार्टीया आन्तरिक प्रतिस्पर्धाय् निर्मल निवासं याःगु नांगां हस्तक्षेपयात भत्र्सना याना धयादीगु दु । उकी वय्कलं ‘थ्यांक यू जीबीबी शाह’ धासें पुलांम्ह जुजु ज्ञानेन्द्र शाहयात समेत ट्याग यानादीगु खः । अथे हे हानं यानादीगु मेगु ट्विटय् वय्कलं धयादीगु दु, ‘मुक्कं देय् गणतन्त्रमय जुयाच्वंगु इलय् नं छ्यनय् कफन हिनाः २०६३ सालंनिसें राजतन्त्रया क्वबिया जुयागुया सिरपाः थौं दत । थ्व एजेण्डाया मुल संवाहकयात राजनीतिक रुपं समाप्त यायेत जूगु कुतःपाखें जुजुया भलो जुइमा !’
थापाया थ्व ट्विटपाखें वय्कः निर्मल निवासप्रति तसकं हे आक्रोशित जूगु खने दुगु खँ धाःगु दु ।
वय्कलं निर्वाचन परिणाम स्वीकार याःसां म्हिगः थनया प्रज्ञा प्रतिष्ठानय् जूगु न्हूम्ह अध्यक्ष प्रतिष्ठापन ज्याझ्वलय् धाःसा ब्वति कयामदी ।
थापां पुलांम्ह जुजु ज्ञानेन्द्रप्रति थथे तप्यंक हे प्रहार यानादीधुंकाः आः वय्कः व पुलांम्ह जुजुया स्वापू गय् यानाः न्ह्याः वनी धइगु खँय् राजनीतिक ख्यलय् चर्चा जूगु दु । कमल थापां इलय् ब्यलय् राजतन्त्रया बारे खँ ल्ह्वनेगु याःसां वय्कलं राजतन्त्रया मुद्दायात कसिक्क मज्वंगु द्वपं पुलांगु दरवारपाखें बीगु खँ पिहां वयेगु याः ।
लिसें राजतन्त्रयात शुरुंनिसें हे थःपिनि मूल मुद्दा दयेकाः न्ह्याः वयाच्वंगु राप्रपाया नेतृत्व परिवर्तन यानाः आः पुलांम्ह जुजु ज्ञानेन्द्रं नं नेपाःया राजनीतिइ छुं ‘खेल’ म्हितेत स्वःगु खनेदु धकाः नं विश्लेषण यानाहःगु दु ।
LEAVE YOUR COMMENTS