फास्ट ट्राय्कया ज्या दिकेत सेनाया हे पौ

येँ – संसदया सार्वजनिक लेखा समितिं नेपाली सेनायात फास्ट ट्राय्कया निगूगु प्याकेजया ठेक्का पनेत निर्देशन बिउगु दु । थ्व स्वयां न्ह्यः नं लेखां स्वक्वः तक पौ च्वयाः थ्व ज्या दिकेत निर्देशन बीधुंकूगु दु ।

समितिया सचिव रोजनाथ पाण्डेया कथं रक्षा मन्त्रालययात तःक्वःमछि पौ च्वयाः निर्देशन बियां नं कार्यान्वयन मजूगुलिं सेनायात हे तप्यंक पौ च्वयाः ठेक्का प्रक्रिया दिकेत निर्देशन बिउगु खः । वय्कलं न्ह्यःने धयादिल, ‘चैत १९ गते हे लेखा समितिं फास्ट ट्राय्कया निगूगु प्याकेज अन्तर्गतया सुरुङ व ताँया ठेक्का प्रक्रियाया प्रि–क्वालिफाइङय् आशंका प्वंकुसें ठेक्का प्रक्रिया रद्द यानाः हाकनं मेगु ठेक्का प्रक्रिया न्ह्याकेत निर्देशन बिउगु खः, तर निर्देशन कार्यान्वयन मजुल ।’

चैत १९ लिपा लेखा समितिं वैशाख ६ गते व ९ गते रक्षा मन्त्रालययात पौ च्वयाः खरिद प्रक्रिया पनेत धाःगु खः । तर सेनां समितिया निर्देशनयात बेवास्ता यासें वंगु वैशाख १२ गते टेन्डर आह्वान याःगु खःसा संसदीय समितिया निर्देशन अःखः ज्या न्ह्याकेवं सेनायात हे पौ च्वयेमाःगु खँ सचिव पाण्डें कनादिल ।

सुरुङ व ताँ दयेकेगु निंतिं नीछगू कम्पनीं प्रतिस्पर्धाय् ब्वति काःगु खःसा सेनां चीनया पोली च्याङ्दा इन्जिनियरिङ कर्पोरेशन लिमिटेडयात जक प्रि–क्वालिफाइड जूगु ठहर याःगु खः । लेखा समितिं छगू हे कम्पनीयात जक प्रि–क्यालिफाइड ठहर यायेगु ज्याया लिउने थीथी कथंया अनियमितता जूगु आशंका यानाच्वंगु दु । लेखाया कथं प्रि–क्वालिफाइडया झ्वलय् सार्वजनिक खरिद ऐन कथं प्रतिस्पर्धा, पारदर्शी व मितव्ययी जुइगु कथं खरिद प्रक्रिया मन्ह्याकूगु आशंका दु । सरकारं धाःसा लेखां अथे पौ च्वःगु खँयात ययेका मच्वंगु खँ धाःगु दु ।

सम्बन्धित बुखँ

LEAVE YOUR COMMENTS