येँय् प्रकाशमान झन् शक्तिशाली

येँ – नेपाली कांग्रेसया येँ जिल्लाय् प्रकाशमान सिंहया शक्ति झन् झन् बल्लाना वःगु दु । म्हीग जूगु येँ जिल्लाया अधिवेशनय् येँया सभापति पदय् प्रकाशमान समर्थित उम्मेदवार कृष्ण (सबुज) बानियाँ निर्वाचित जुयादीवं सिंहया शक्ति अझ क्वातुया वःगु खः ।

पार्टीया झिंप्यक्वःगु तःमुँज्याया झ्वलय् येँय् जूगु मतदानय् बानियाँ १९५७ भोट हयाः निर्वाचित जुयादीगु खः । वय्कःया निकटम प्रतिद्वन्द्वी उपेन्द्र कार्कीं १०८९ मत कयादीगु खः ।

उकथं हे येँया उपसभापतिइ राजकुमार नकर्मी व गोकर्ण केसी, सचिवय् इन्द्रबहादुर थापा व गोविन्द पुडासैनी अले सहसचिवय् रोमेल श्रेष्ठ व प्रा. डा. अमिता प्रधान निर्वाचित जुयादीगु दु ।

सभापति निर्वाचित बानियाँ थ्व स्वयां न्ह्यः नं येँया कांग्रेस सभापति खः । कांग्रेसया तःमुँज्या मंसिर २४ निसें २६ गते तक येँय् जुइ ।

थुगु तःमुँज्याय् थुगुसी न्हापांखुसी येँयाम्ह नेता प्रकाशमान सिंहं सभापति पदय् उम्मेदवारी बीगु घोषणा यानादीगु दुसा उकिया लागिं वय्कलं धमाधम शक्ति संग्रह याना च्वनादीगु दु ।