न्हापांखुसी चचा म्येँ हालेगु प्रशिक्षण

येँ – नेपाल परम्परागत बौद्ध धर्म संघ व त्रिरत्न कोषया मंकाः ग्वसालय् जूगु चचा म्येँया प्रशिक्षणय् झिंखुम्हेसिनं प्रशिक्षण काःगु दु । वज्रयान बौद्ध धर्मय् अतिकं दुर्लभ कथं कयातःगु थुकथंया चचा हालेगु प्रशिक्षण न्हापांखुसी जूगु खः ।थनया छुस्याबहालय् च्वंगु गुणाकर महाविहारय् चचा गुरु मणिरत्न वज्राचार्य व संगीताचार्य दीपेन्द्र वज्राचार्यं मंकाः कथं उगु प्रशिक्षण बियादीगु खः ।

वज्राचार्य गुरुजुपाखें वाचन जूगु म्येँ न्यनाः उकियात कण्ठ यानाः संरक्षण यायेगु परम्परा दया वयाच्वंगु चचा म्येँ न्हापांखुसी थुकथं प्रशिक्षण बियाः थुकियात संरक्षण यायेगु ज्या न्ह्याःगु खः । चचा म्येँ व प्याखं मेपिंत क्यने मजिउगु विद्याया रुपय् कयातःगु दु । थुकियात गुह्यतन्त्रया आधारय् पुर्खांपिंसं शिक्षित यायेगु परम्पराया रुपय् थुकिया शिक्षादिक्षा बीगु याना वयाच्वंगु खः ।

वज्रयान धर्मय् ततःधंगु पूजा व अज्याःगु हे विशेष ज्याझ्वलय् जक हालेगु याना वयाच्वंगु दु । नेपाःया बौद्ध धर्मया संरक्षण व संवद्र्धन यायेगु व तना वनेत्यंगु अवस्थाय् थ्यने धुंकूगु चर्चा म्येँयात जीवन्त याना तयेया निंतिं थुकथंया प्रशिक्षण ज्याझ्वः न्ह्याकागु संघं जानकारी बिउगु दु ।

चचा म्येँया प्रशिक्षण कयादीपिं प्रशिक्षार्थीपितं लुम्बिनी बौद्ध विश्वविद्यालयया उपकुलपति डा. नरेशमान वज्राचार्यं दसिपौ लःल्हानादीगु खः । वय्कलं शास्त्रीय संगीतय् दुनाः हालेमाःगु चचा म्येँयात सही थासय् सही धंगं छ्यलाबुला यायेत इनाप यासें थुकिया दुरुपयोग मयायेत प्रशिक्षार्थीतय्त इनाप यानादिल ।

स्वलायंकंया प्रशिक्षणय् मञ्जुश्रीरत्न वज्राचार्य, बसन्तहर्ष वज्राचार्य, दशरथ वज्राचार्य, बाबुराजा वज्राचार्य, विजयविलास वज्राचार्य, अशोकमुनि वज्राचार्य, महेशमान वज्राचार्य, चिनियाँकाजी वज्राचार्य, आनन्दमुनि वज्राचार्य, दयानन्द शाक्य, युवकरत्न वज्राचार्य चर्चा म्येँया दिक्षा प्राप्त यानादीगु खः ।