ने. सं. ११४४ ञलाथ्व दशमी -

अन्ततः ओलीं नं चुनाव ल्वाये माल

चितवन- थन जुयाच्वंगु एमालेया झिक्वःगु तःमुँज्याय् वरिष्ठ उपाध्यक्ष, महासचिव व उप– महासचिव बाहेक मेगु पदय् चुनाव जुइगु जूगु दु । एमालेया प्रमुख निर्वाचन आयुक्त विजय सुब्बाया कथं थीथी झिंखुगू पुचःया चुनावपाखें नेतृत्व ल्यइगु जूगु दु ।

निर्वाचन आयुक्त सुब्बाया कथं अध्यक्ष, उपाध्यक्ष व सचिव निर्विरोध मजुइगु जूगु दु । अध्यक्षय् केपी ओली व भीम रावलं उम्मेदवारी बिउगु दुसा उपाध्यक्ष न्हय्म्ह व सचिवय् गुम्हेसिया उम्मेदवारी लाःगु दु । निर्वाचनं छम्ह अध्यक्ष, न्याम्ह उपाध्यक्ष व न्हय्म्ह सचिव ल्यइ ।

आयुक्त सुब्बाया कथं प्रदेश १ व बागमति प्रदेशया खुला दुजः, सम्पर्क समन्वय क्षेत्र, कर्णाली व सुदूर पश्चिमया खुल्ला दुजः, सुदुरपश्चिमया मिसा दुजः पदय् निर्वाचन जुइ । उकथं हे आदिवासी जनजाति खुल्ला दुजः, आदिवासी जनजाति मिसा दुजः पदय् नं निर्वाचन जुइसा मधेशी खुल्ला, दलित खुल्ला, थारु, खुल्ला, मिसा खुल्ला, मुस्लिम खुल्ला व लिउने लाःगु क्षेत्रया खुल्ला व मिसा कोटाय् अप्वः उम्मेदवारी लाःगु दु । उकथं हे खुल्ला केन्द्रीय दुजलय् नं माक्व स्वयां अप्वः उम्मेदवारी लायेवं निर्वाचन याकेमाःगु खः ।

थ्वहे झ्वलय् पूर्व माओवादीपाखें उम्मेदवार जूपिं स्वम्हेसिया अवस्था छु जुइ धइगु चर्चा शुरु जूगु दु । एमालेया पदाधिकारीइ पुलांपिं माओवादीपाखें वःपिं नेतात उम्मेदवार जूगु पदय् निर्वाचन जुइगु जुइवं उकथं चर्चा जूगु खः । पूर्व माओवादीपाखें रामबहादुर थापां उपाध्यक्षय् उम्मेदवारी बिउगु दुसा सचिवय् टोपबहादुर रायमाझी व लेखराज भट्टं उम्मेदवारी बिउगु दु । सचिवय् थप निम्ह नेतापिं भीम आचार्य व टंक कार्कीं उम्मेदवारी बिउगुलिं वय्कःपिनिगु अवस्था अनिश्चित जूगु खः ।

सहमतिया कुतः ताःमलायेवं स्वन्हुं क्वचायेमाःगु एमालेया तःमुँया न्यान्हु तक न्ह्याइगु जूगु दु । थुकिं यानाः सहमति घाघः जूवंगु टिप्पणा जूगु दु ।