जनबहाःया द्यःया खःया घःचाः दयेकेत ज्ञापन पौ

येँ(नेपालभाषा टाइम्स)-सेता मच्छिद्रनाथ रथजात्रा व्यवस्थापन समितिं जनबहाःया द्यःया खःया घःचाः दयेकेत इनापयासें गुथि संस्थान येँयात छपु ज्ञापन पौ लःल्हाःगु दु । समितिया नायः नीलकाजी शाक्यं जनबहाःया द्यःया खःया घःचाः इलय् हे दयेकेत इनाप यासें गुथि संस्थान येँया प्रमुख राजेन्द्र सुवेदीयात ज्ञापन पौ लःल्हानादीगु खः ।

वइगु चैत महिनाय् जुइगु जनबहाः द्यःया खः सालेगु जात्रा न्ह्यः हे खःया घःचाः व घःमाःलिसें रथय् यायेमाःगु मर्मत सम्भारया ज्या इलय् हे क्वचायेकेत इनाप यासें ज्ञापन पौ लःल्हाःगु खः । जनबहाः द्यःया खः (रथ)या घःचाः व घःमाः स्यनेधुंकूगुलिं याकनं दयेकेत इनाप यासें ज्ञापन पौ लःल्हानागु समितिं धाःगु दु ।

थ्व स्वयां न्ह्यः समितिं गुथि संस्थानया प्रशासकीय प्रमुख किरण शाक्ययात नं थ्व हे विषययात कयाः ज्ञापन पौ लःल्हानागु समितिया नायः शाक्यं कनादीगु दु ।