विमान दुर्घटनाय् उद्धारय् त्रुटि जूगु स्वीकार

येँ -वंगु वालय् थनया त्रिभुवन अन्तर्राष्ट्रिय विमानस्थलय् बंगलादेशया विमान दुर्घटना जुइधुंकाः तत्काल याये माःगु उद्धारया ज्या व सुरक्षा संयन्त्रय् आपालं त्रुटि जूगु खँ सरकारं स्वीकार याःगु दु । विमान दुर्घटना जुइधुंकाः उद्धारया ज्याय् आपालं सुस्तता वःगु व लिपा सर्वसाधारण मनूत तकं धावनमार्गय् दुहां वनाः दुर्घटनाग्रस्त विमान दुने थ्यंक वंगु खँयात आपत्तिजनक तायेकुसें सुरक्षा संयन्त्रया भद्रगोलं यानाः अथे जूवंगु खँ नं महसुस याःगु दु ।

नेपाली सेना, सशस्त्र प्रहरी व प्रहरी लगायत विमानस्थलया उच्च कर्मचारीतय् दथुइ म्हीग जूगु छगू बैठकय् थ्व खँयात स्वीकार याःगु खः ।

विमानस्थलय् थज्याःगु दुर्घटना न्हापा लिपा गबलें मजूनिगु कारणं नं अन च्वंगु सुरक्षा संयन्त्र लगायत मेमेगु युनिट आँटे चाःगु खँ नं अन ब्रिफिङ जूगु खः । उद्धारय् खटे जूवंपिं मध्ये नं गुलिखे सुरक्षाकर्मीत ज्या त्वःताः विमानया नापं च्वनाः सेल्फी खिचे यानाच्वंगु तस्बीर नं आपालं भाइरल जूगु खः । उगु बैठकं थज्याःगु उद्धारया लागिं यायेमाःगु तयारी बारे पुनर्विचार यायेमाःगु निष्कर्ष पिकाःगु खः ।