पेट्रोलया कर हे दकलय् अप्वः

येँ – देशय् पेट्रोलियम पदार्थया भाः थहां वनाच्वंंगुया मू कारण अन्तर्राष्ट्रिय बजारय् भाः थहां वंगु स्वयां नं राज्यं पेट्रोलियम पदार्थय् धाइगु कर जुयाच्वंगु खँ पिहां वःगु दु ।

भारतया इण्डियन आयल निगमं नेपाःयात पेट्रोल मीबलय् प्रति लिटर ८४ तका ३२ पैसा जक काइगु खः । थुकी नेपाल सरकारं प्रति लिटर ५८ तका ४८ पैसा कर कायेगु यानाच्वंगु दु । थुकी आयल निगमं प्रशासनिक एवं विक्री खर्च व प्राविधिक नोक्सानी वापत धकाः प्रतिलिटर १ तका ७७ पैसा थपे यानाः काइ । अले ढुवानी खर्च धकाः थुकी प्रति लिटर ५ तका ११ पैसा मेगु कायेगु याइ । पेट्रोलियम पदार्थ मीगु पम्पं प्रति लिटर ५ तका ५५ पैसा लबः कायेगु याइ । थ्व फुक्क जोडे यानाः जक थौंकन्हय् पेट्रोल लिटरं १४२ तका थ्यनाच्वंगु खः गुगु उपभोक्तातय्सं पुलेगु याइ ।

थुकथं हे डिजेलय् नं सरकारं काइगु करया दर तसकं अप्वः थ्यनाच्वंगु दु । डिजेल प्रति लिटरया खास भाः ८५ तका ४२ पैसा खःसा उकी सरकारं प्रति लिटर ४१ तका १६ पैसा कर कायेगु यानाच्वंगु दु ।

थुकथं हे सरकारं मचिकनय् नं प्रति लिटर १९ तका ३२ पैसा कर कायेगु यानाच्वंगु दु । जब कि भारतं नेपाःयात मचिकं प्रति लिटर ७९ तका १० पैसां बीगु यानाच्वंगु दु ।

थ्व सकतां पदार्थय् आयल निगमया प्रशासनिक खर्च, ढुवानी खर्च, जल्ती खर्च व पेट्रोल पम्पतय्सं काइगु लबः समेत जोडे यायेबलय् कुल भाः तसकं यक्व जू वनीगु खः । थुकी मध्ये नं सरकारं काइगु करया दर धकाः दकलय् अप्वः जुयाच्वंगु व उकिं यानाः हे नेपालय् पेट्रोलियम पदार्थया भाः थिके जुयाच्वंगु खँ धाःगु दु ।

नेपाल आयल निगमया पदाधिकारीतय्सं सरकारपाखें काइगु करया दर हे यक्व जूगुलिं भाः थहां वनाच्वंगु खँ धायेगु यानाच्वंगु दु ।

कर क्वकयाः राहत बीत माग
पेट्रोलियम पदार्थ थौंकन्हय् जनतायात मदयेक मगाःगु साधन जुइधुंकूगु कारणं थुकी सरकारं कयाच्वंगु कर क्वकयाः जूसां जनतायात राहत बीमाःगु माग उपभोक्ता समूहतय्सं धायेगु याना हःगु दु । पेट्रोलया भाः तसकं थहां वनाच्वंगु जनतायात मार जुयाच्वंगु इलय् सरकारं कर घटे यानाः जनतायात राहत बीमाःगु सुझाव उपभोक्ता समूहतय्सं बियाहःगु दु । सरकारं कयातःगु कर घटे यायेगु बाहेक राहत बीगु मेगु उपाय मदुगु खँ नं धयाहःगु दु ।

सरकारया सूत्रतय्सं धाःसा नेपालय् कर क्वकयाः भाः घटे यायेसातकि भारतय् सिबें नं नेपालय् पेट्रोलया भाः कम जुइगु व उकिं यानाः भारतपाखे चोरी निकास जुइगु जुयाः कर घटे याये मजिउगु तर्क बीगु यानाच्वंगु दु ।