थेरवाद स्वास्थ्य अक्षय कोषया निंतिं ध्यबा लःल्हात

येँ – नेपाल परम्परागत बौद्ध धर्म संघपाखें प्रव्रजित स्वास्थ्योपचार कोषया निंतिं आर्थिक ग्वाहालि लःल्हाःगु दु । थनया छुस्याबहाःस्थित गुणाकर महाविहाय् छुं दिं न्ह्यः जूगु छगू ज्याझ्वः दथुइ संघपाखें कोषया निंतिं आर्थिक ग्वाहालिकथ छगू लख तका दां लःल्हाःगु खः ।

बौद्ध विद्वान प्रा. डा. नरेशमान वज्राचार्यया सभापतित्वय् जूगु ज्याझ्वलय् वय्कलं हे कोषया निंतिं संघपाखें आर्थिक ग्वाहालि लःल्हानाबिज्याःगु खः । वसपोलं अखिल नेपाल भिक्षु महासंघया महासचिव भिक्षु कोण्डन्य महास्थविरयात उगु आर्थिक ग्वाहालि लःल्हानाबिज्याःगु खः । उगु इलय् प्रा. डा. वज्राचार्यं वज्रयान विधिकथं त्रिरत्न शरण गमन न याकाबिज्याःगु खः।

संघया कान्तिपुर शाखाया राजगुरुजु मञ्जुश्रीरत्न वज्राचार्यं लसकुस यानादीगु ज्याझ्वलय् प्रा. डा. वज्राचार्य, भिक्षु महासंघया महासचिव भिक्षु कोण्डन्य महास्थविर, संघया केन्द्रीय सचिव दिनेश शाक्य लगायतं नुगःखँ तयाबिज्याःगु खः ।

लुमंकेबहजू वंगु असोज महिनाय् श्रद्धालु दाता उपासक साहु पंचवीर सिंह तुलाधरं नेपाःया थेरवाद बुद्ध शासनय् प्रव्रजित जुयाबिज्याःगु श्रद्धेय भिक्षु, श्रामणेर व अनागारिकापिनिगु स्वास्थ्योपचारया निंतिं छगू अक्षय कोष स्वनादीगु खः । उगु इलय् तुलाधरं प्रव्रजितपिनिगु स्वास्थ्योपचारया निंतिं छगू करोड झिंछगू लख झिंछद्वः व सछि व झिंछतका दांया कोष स्वनादीगु खः ।

अखिल नेपाल भिक्षु महासंघ मातहतय् कोषया ध्यबा मस्यंकुसे ब्याज जक छ्यलाः परन्तुतक न्ह्याका यंकेगु ल्याखं नीस्वंगू उगु कोषय् थीथी बौद्ध संघसंस्था व उपासक उपासिकापाखें नं ग्वाहालि यायेगु प्रतिवद्धता प्वंकूगु खः ।