नेपालभाषा एकेदमिया झिंच्याक्वःगु साधारणसभा

किपू – नेपालभाषाया प्राज्ञिक संस्था नेपालभाषा एकेदमिया झिंच्याक्वःगु साधारणसभा वंगु शनिवाः थन च्वंगु एकेदमिया थःगु हे भवनय् जुल । साधारणसभां पुलांगु हे ज्यासना पुचःयात आः वइगु छगू कार्यकालया निंतिं नं निरन्तरता बीगु निर्णय याःगु दु ।एकेदमिया चान्सलर चित्तरञ्जन नेपालीया सभापतित्वय् जूगु साधारणसभाय् एकेदमिया संरक्षक नापं वाङ्मय शताब्दी पुरुष सत्यमोहन जोशी मूपाहांकथं झायादीगु खः ।

साधारणसभाय् एकेदमिया सदस्य सचिव मल्ल के. सुन्दं वार्षिक प्रगति विवरण न्ह्यब्वयेमाःगु खःसां वय्कः म्हं मफयाः ज्याझ्वलय् उपस्थित जुया मदीवं एकेदमिया हे दुजः प्राज्ञ प्रा. प्रेमशान्ति तुलारधं उगु प्रतिवेदन न्ह्यब्वयादीगु खः । अथे हे वार्षिक आर्थिक प्रतिवेदन एकेदमिया दांभरिं डा. पुष्पराज राजकर्णिकारं न्ह्यब्वयादीगु खः ।

उगु साधारणसभां एकेदमिया न्हूगु ज्यासना पुचःया नं ल्यज्या याःगु खः । न्हूगु ज्यासना पुचः चान्सलर चित्तरञ्जन नेपालीया नेतृत्वय् मेगु छगू कार्यकालयात निरन्तरता बीगु कथं सर्वसम्मति याःगु दु । अथे हे मेमेगु पदय् नं पुलांगु हे कार्यसमितियात निरन्तरता बिया वनेगु सहमति याःगु दुसा सहवरण कथं थप न्हूपिं न्याम्ह दुजः ल्यइगु खँ धाःगु दु । न्हूगु ज्यासना पुचःया आः च्वनीगु मुँज्यां सहवरणकथं न्याम्ह न्हूपिं दुजः थप याइगु खँ धाःगु दु ।