मन्त्री वयेवं सचिव बेपत्ता !

येँ(नेपालभाषा टाइम्स)- जनार्दन शर्मा हाकनं अर्थमन्त्री नियुक्त जुइवं अर्थ सचिव मधुकुमार मरासिनी धाःसा बेपत्ता जूगु दु । शर्मा अर्थमन्त्री नियुक्त जुइवं वय्कलं म्हिगः हे शपथ लिपा अर्थ मन्त्रालयय् पदभार ग्रहण याइगु ज्याझ्वः दुगु खः । लिसें मन्त्रालयया कर्मचारीतय्त नं अनिवार्य उपस्थिति याकि धकाः सर्कुलर नं जारी याःगु खः । तर अर्थ सचिव मरासिनी धाःसा विदा कयाः पोखरापाखे वना बिल ।

थ्व स्वयां न्ह्यः अर्थमन्त्री शर्मां राजीनामा बिउगु इलय् नं सचिव मरासिनी विदाय् च्वंगु खः । अर्थमन्त्रीं राजीनामा बीधुंकाः प्रधानमन्त्री शेरबहादुर देउवाया निर्देशन लिपा सचिव मरासिनी मन्त्रालयय् हाजिर जूगु खः । म्हिगः अर्थमन्त्री शर्मायात राजश्व सचिव कृष्णहरि पुष्करं लसकुस याःगु खः ।