थप छम्हेसित कोरोनाया संक्रमण, संत्रमितत ३१म्ह थ्यन

येँ – कोरोना भाइरस (कोभिड–१९)पाखें थप छम्ह संक्रमण जूगु दु । स्वास्थ्य तथा जनसंख्या मन्त्रालयं बिउगु जानकारी कथं ६५दँया मिजंयात कोरोनाया संक्रमण जूगु खः ।

उदयपुरया त्रियुगा नगरपालिका भुल्केस्थित मस्जिदय् दुम्ह थप छम्हेसित कोरोना भाइरस संक्रमणया पुष्टि जूगु दु । संक्रमण पुष्टि जुम्ह मनू ६५दँ दुम्ह भारतीय नागरिक खः । विराटनगरस्थित कोसी अस्पतालय् याःगु पीसीआर परीक्षणपाखें संक्रमण पुष्टि जूगु खः ।

थ्वस्वयां न्ह्यः उदयपुरया भुल्केस्थित मस्जिदय् दुपिं झिंनिम्हेसित कोरोना संक्रमणया पुष्टि जूगु खः । संक्रमित झिंनिम्ह नापं मोरङया टाँडीस्थित क्वारेन्टाइनय् तयातःपिंत प्यम्हेसित शनिवाः परीक्षण याःगु खः । उकी मध्ये थाैं छम्हेसित संक्रमण जूगु पुष्टि जूगु खः ।

थ्व नापं नेपालय् कोरोना संक्रमिततय् ल्याः ३१म्ह थ्यंगु दु ।