भारतीय विदेशसचिव ११ गते वइगु

कालापानी व सुस्ताया सीमा विवादबारे सहलह मजुइगु

येँ (नेपालभाषा टाइम्स) – भारतीय विदेश सचिव हर्षवर्धन शृब्गला वइगु मंसिर ११ गते निन्हुया औपचारिक भ्रमणया निंतिं नेपाः वइगु जूगु दु । वय्कः नेपाः वइगु जूसां नेपाः व भारत दथुइ थौंकन्हय् विवाद जुयाच्वंगु कालापानी सीमायात कयाः धाःसा सहलह मजुइगु खँ धाःगु दु ।

भारतीय विदेश सचिव नेपाः वइगु खँ न्हापा हे पिहां वयाच्वंगु खःसां नेपाःया परराष्ट्र मन्त्रालयं धाःसा थुकी अनभिज्ञता प्वंका वयाच्वंगु खः । आः मन्त्रालयं विदेश सचिवया नेपाः भ्रमणयात कयाः थौं छगू प्रेस विज्ञप्ति पिकयाः औपचारिक घोषणा यायेत्यंगु खँ धाःगु दु। मन्त्रालयया स्रोतया कथं भारतीय विदेश सचिव ११ गते सुथय् विशेष विमानपाखे येँय् वयेत्यंगु खः ।

येँय् थ्यनेवं विदेश सचिवं थः समकक्षी परराष्ट्र सचिव भरतराज पौडेललिसे नापलानाः सहलह याइ । वयां लिपा राष्ट्रपति विद्यादेवी भण्डारी, प्रधानमन्त्री केपी शर्मा ओली व परराष्ट्रमन्त्री प्रदीप ज्ञवालीलिसे सहलह याइगु ज्याझ्वः तयातःगु दु । मंसिर १२ गते भारतीय विदेश सचिवं नेपाः-भारत सम्बन्ध विषयय् छगू ज्याझ्वलय् सम्बोधन यानादी । वयां लिपा वय्कलं नेपाः व भारतया दथुइया परियोजना सम्बन्धी छगू ज्याझ्वलय् ब्वति कयादी ।

भारतीय विदेश सचिवया भ्रमणया मू उद्देश्य नेपाः-भारत मंकाः आयोगया बैठकया तयारी यायेगु कथं जुइगु खँ धाःगु दु। निगुलिं देय्या परराष्ट्रमन्त्रीं नेतृत्व याइगु उगु संयन्त्रया बैठक वइगु डिसेम्बर महिनाया निगूगु वालय् न्हू दिल्लीइ यायेगु तयारी जुयाच्वंगु दु । बैठकय् ब्वति कायेगु नितिं परराष्ट्र मन्त्री ज्ञवाली न्हू दिल्ली वनेगु ज्याझ्वः तयातःगु दु ।

भारतीय विदेश सचिवया नेपाः भ्रमणया झ्वलय् कालापानी व सुस्ता विवादयात कयाः धाःसा सहलह मजुइगु खँ धाःगु दु। भारतीय विदेश सचिवया भ्रमणया झ्वलय् औपचारिक रुपं परराष्ट्र सचिव स्तरीय बैठक च्वनेगु धकाः धाःगु खःसां नं उगु विषयसं वार्तामजुइगु खँ धाःगु दु । विदेश सचिव नियुक्त जुइधुंकाः भारतीय विदेश सचिव शृब्गलाया थ्व न्हापांगु नेपाः भ्रमण जूगु कारणं यानाः कालापानी व सुस्ताया बारे खँ मजुइगु खँ सीदुगु दु। भारतीय विदेश सचिवया थ्व भ्रमण शिष्टाचार भ्रमण जूगुलिं मंकाः आयोगया बैठकया एजेन्डा बारे धाःसा सहलह जुइफइगु खँ सूत्रं धाःगु दु ।

नेपालय् ब्वलनाच्वंगु राजनीतिक घटनाक्रमया झ्वलय् भारतपाखें जुइत्यंगु थ्व स्वंगूगु उच्चस्तरीय भ्रमण खः । थ्व स्वयां न्ह्यः भारतीय गुप्तचर संस्थाया प्रमुख सामन्तकुमार गोयल व भारतीय सेनापति एमएम नरवाणे नेपाः भ्रमण यायेधुंकूगु दु ।