आः स्वनिगलय् झिंनिद्वः सक्रिय संक्रमित

येँ – नेपालय् बिहिवाः न्हिछिया दुने थप २६०७ म्हेसिके कोरोना संक्रमण खनेदुगु दु । अथेहे ३९ म्ह कोरोनां कयाः सीगु खँ स्वास्थ्य तथा जनसंख्या मन्त्रालयं धाःगु दु । बिहिवाः मुक्कं १२४८४ म्हेसिया कोरोना परीक्षण याःगुली थुलि संक्रमित जूगु खः । अथेहे बिहिवाः २४ घौ दुने २१४१ म्ह संक्रमण मुक्त जूगु दु ।

मन्त्रालयया कथं आः देय्न्यंकं ६१,७२५ म्ह सक्रिय संक्रमितत दुसा थुकी मध्ये येँय् ७१३५ म्ह, ख्वपय् २३०८ म्ह व यलय् ३०७१ म्ह यानाः स्वनिगलय् १२,५०० म्ह सक्रिय संक्रमितत दु ।