न्हापांगु हलिं नेवाः न्ह्यसः लिसः कासाय् त्याःपिंत सिरपाः लःल्हात

येँ – वल्र्ड नेवाः अर्गनाइजेसन (डब्लुएनओ)या ग्वसालय् न्ह्यानाच्वंगु न्हापांगु हलिं नेवाः न्ह्यसः लिसः कासा –११४१ औपचारिक रुपं क्वचाःगु दु । डब्लुएनओ पलिस्था जूगु छगू दशक क्यंगु लसताय् वंगु प्यला न्ह्यवंनिसें न्ह्यानाच्वंगु न्ह्यसः लिसः कासाय् विजयी जुयादीपिंत सिरपाः लःल्हायेगु ज्याझ्वलिसें औपचारिक रुपं क्वचाःगु खः ।

वंगु शनिवाः थनया जगतसुन्दर ब्वनेकुथिइ डब्लुएनओया नायः सिजन श्रेष्ठया सभापतित्वय् जूगु ज्याझ्वलय् संघीय मामिला तथा सामान्य प्रशासन मन्त्री राजेन्द्रप्रसाद श्रेष्ठ मूपाहांकथं व येँ महानगरपालिकाया उपप्रमुख हरिप्रभा खड्गी श्रेष्ठ विशेष पाहाकथं झायादीगु खः ।

ज्याझ्वलय् पाहांकथं दकलय् न्हापां अन्तर हाइस्कुल नेपालभाषा न्ह्यसः लिसः कासा न्ह्याकादीम्ह नापं साहित्यकार हितकरवीर सिंह कंसाकार, नेवाः देय् दबूया नायः नरेश ताम्राकार, नेवाः न्ह्यलुवालिसें कासाया निर्णायक मल्ल के. सुन्दर, कवयित्री नापं निर्णायक प्रतिसरा साय्मि, डब्लुएनओ नेपाः देय् मूकवःया सल्लाहकार पुष्करभक्त माथेमा पाहांकथं झायादीगु खः ।

कासाय् न्हाप लाःगु यलबुक स्वां पुचःयात ६०० अमेरिकी डलर, लिउ लाःगु गुलाफ स्वां पुचःयात ४५० अमेरिकी डलर, लियांलिउ लाःगु सिन्हः स्वां पुचःयात ३०० अमेरिकी डलर व हःपाः कथं अजू स्वां पुचःयात १५० अमेरिकी डलर सिरपाः लिसें दसिपौ लःल्हाःगु खः । अथे हे कासाय् ब्वति काःगु प्रत्येक पुचःयात नं १५ अमेरिकी डलरलिसें दसिपौ नं लःल्हाःगु खः ।

नेपाःया राष्ट्रिय गान व नेवाः राष्ट्रिय म्येँ हायेकाः न्ह्याःगु ज्याझ्वलय् क्यानाडाय् च्वनादीम्ह रञ्जना सैंजूं सितारय् मंगलधुन व नांजाःम्ह सरोदवादक सुदर्शन राजोपाध्यायं नेवाः म्येँय् सरोद थानादीगु खः । कासाया कजि विमलमान श्रेष्ठ, न्ह्यसः लिसः निर्माण कमिटीया कजि साहित्यकार केशरमान ताम्राकार, पाहांपिं नापं निर्णायकमण्डल व न्हाप लाःगु पुचःया नायः इसिका महर्जनं नुगःखँ तयादीगु खःसा शताब्दीपुरुष सत्यमोहन जोशीं भिंतुना सन्देश बियादीगु खः ।

ज्याझ्वलय् निर्णायकमण्डल, सिरपाः दाता, आर्थिकलिसें थीथीकथं ग्वाहालि यानादीपिंत मतिनाया चिं नं लःल्हाःगु खः । नेपालं पिने च्वंपिं डब्लुएनओया पदाधिकारीपिंसं जूम प्रविधिपाखें ब्वति कयादीगु खः ।

च्यागू निसें झिंनिगू तगिं तकया ब्वँमिपिनि दथुइ जूगु कासाय् नेपाः, अमेरिका, क्यानाडा, बेलायत, आयरल्याण्डपाखें नीगू पुचलं ब्वति काःगु खः ।