सांसद कोष विरुद्ध रिट दर्ता

येँ (नेपालभाषा टाइम्स)- सांसद विकास कोष खारेज यायेमाःगु माग यासें सर्वोच्च अदालतय् रिट लाःगु दु । आर्थिक दँ २०८०÷८१ या बजेटय् थ्व कोषया लागिं ध्यबा फ्यायेवं थ्व विकास कार्यक्रम खारेज यायेमाः धइगु माग यासें म्हिगः सर्वोच्च अदालतय् रिट दर्ता जूगु खः । प्रधानमन्त्री तथा मन्त्रिपरिषद कार्यालय व अर्थ मन्त्रालययात विपक्षी दयेकाः अधिवक्तापिं अनिल आचार्य, राधिका खतिवडा, नन्दरराज उपाध्याय व श्यामबहादुर ढकालं उगु रिट तःगु खः । थौं थुकिया पेशी दु ।

‘सांसद विकास कोष’ नं धाइगु थ्व संसदीय क्षेत्र पूर्वाधार विकास कार्यक्रमया नामय् प्रति सांसद ५ करोड तका बीगु व्यवस्था दु । थुकिं यानाः देय्यात ८ अर्ब २५ करोड तका व्ययभार जुइ धासें रिटय् बजेटया उगु व्यवस्था खारेज यायेत माग यानातःगु दु ।

रिटय् थुगु कार्यक्रम जनहित अःखः, बहुसंख्यक सांसद व जनतां तिरस्कृत जूगु धासें तत्काल कार्यान्वयन मयाकेत अन्तरिम आदेश बीत नं माग यानातःगु दु । थ्व बजेटयात संघीयताया मर्म विपरित खः धकाः नं उकी दावी यानातःगु दु ।

थौंकन्हय् देय्या धुकू इतिहासय् हे दकलय् कमजोर अवस्थाय् लानाः कर्मचारीया तलब तकं बी मफयाच्वंगु इलय् थज्याःगु विवादित व बजेटया दुरुपयोग जुइगु ज्याझ्वः तये मजिउगु खँ नं रिटय् न्ह्यथनातःगु दु ।

रिट तःपिं अधिवक्तातय्सं संविधानय् सांसदतय्गु ज्या कानून दयेकेगु जक खः धकाः न्ह्यथनातःगु जुयाः मेमेगु विकास निर्माणया ज्याय् उमिसं ल्हाः तः वनेगु धइगु संविधानया अःखः जुइ धकाः नं थःपिनि रिटय् दावी यानादीगु दु ।

अथे हे महालेखा परीक्षकं दकलय् अप्वः बेरुजु पिकाइगु खर्च नं थ्वहे जुयाच्वंगु खँ नं धाःगु दु । सांसद विकास कोषपाखें खर्च याइगु दां बांलाक
फछ्र्यौट याये मफयाः आपालं सांसदत बेरुजुइ लानाच्वंगु दु । न्हापा एमालेया अर्थमन्त्री बिष्णु पौडेलं थ्व कोष खारेज याना बीधुंकूगु खः ।