एसईई परीक्षा मचीकेत सुझाव

येँ (नेपालभाषा टाइम्स)-राष्ट्रिय परीक्षा बोर्डं माध्यमिक शिक्षा परीक्षा (एसईई) चीके मजिउगु सुझाव बिउगु दु । म्हिगः च्वंगु शिक्षा समितिया बैठकय् विद्यालय शिक्षा विधेयकयात कयाः बोर्डया धारणा तयेगु झ्वलय् अध्यक्ष डा. महाश्रम शर्मां उगु सुझाव बियादीगु खः । वय्कलं थःगु खँ तयेगु झ्वलय् धयादिल, ‘एसईई जुइमाः । तर, केन्द्रीकृत मखुसें प्रादेशिक रुपय् जुइमाः धइगु जिमिगु मान्यता खः ।’

वय्कलं शिक्षा विधेयकय् तगिं ८ व १२ य् परीक्षा जुइगु खँ न्ह्यथनातःगु धासें उगु प्रावधानं विद्यार्थीया पढाइ झन जक म्हो जुइगु तर्क नं तयादिल । सुझाव बीगु झ्वलय् वय्कलं धयादिल, ‘थौंकन्हय् च्यागू तगिमय् परीक्षा जुइ, वयां लिपा झिगू तगिमय् व झिंनिगू तगिमय् परीक्षा जुयाच्वंगु दु । यदि च्यागू तगिमय् परीक्षा कायेधुंकाः तप्यंक झिंनिगू तगिमय् परीक्षा जुइ, थुकिं प्यदँया ग्याप जुइ, प्यदँया ग्याप जुइबलय् विद्यार्थीया ब्वनेगु व मूल्यांकनय् म्होति वइगु खःला धइगु जिमिगु चिन्ता खः ।’

थौंकन्हय् कक्षा ११ या परीक्षा सम्बन्धित विद्यालयं कायेगु याइ । विद्यालयं परीक्षा काइबलय् सतप्रतिशत विद्यार्थी पास जूसां १२ या परीक्षा बोर्डं काइगु इलय् ५० धाःसा प्र्रतिशत जक विद्यार्थी पास जुयाच्वंगु दु ।

थ्वहे झ्वलय् पाठ्यक्रम विकास केन्द्रं विद्यालय तहलय् मांभासं ब्वंकेगु ज्या उत्साहजनक मजूगु खँ धाःगु दु । प्रतिनिधिसभा अन्तर्गत शिक्षा स्वास्थ तथा सूचना प्रविधि समितिया सहलह ज्याझ्वलय् न्ववायेगु झ्वलय् केन्द्रया महानिर्देशक बैकुण्ठ अर्यालं मांभासं ब्वनीपिनिगु ल्याः म्हो जूगु खँ धयादीगु खः । वय्कलं ३१ गू भासं मांभाय्या पाठ्यक्रम तर्जुमा यानागु खःसां नं मांभासं ब्वंकीपिं शिक्षक तकं चूलाके मफुगु खँ नं धयादीगु दु । मांभासं ब्वंकेगु नितिं छगू भाय्या न्यासः खुसः सफू छापे यानाः नं सफू न्याइपिं मवःगु खँ नं वय्कलं कनादिल ।