विश्व बाखं मुँज्या

येँ -वल्र्ड नेवाः अर्गनाइजेसन युएसए च्याप्टरया ग्वसालय् नेपाल संवत् ११४० न्हूदँया लसताय् थ्व हे वंगु शनिवाः विश्व बाखं मुँज्या जुल । अर्गनाइजेसनया युएसए च्याप्टरया ग्वसालय् न्हापांखुसी जूगु बाखं मुँज्या शनिवाः नेपाःयाईकथं बहिनिसिया ८ः४५ ताःइलय् न्ह्याःगु खः।

अमेरिकाया शिकागो सहरय् च्वंच्वनादीम्ह साहित्यकार केशरमान ताम्राकारं संयोजन यानादीगु विश्व बाखं मुँज्याय् आपालं श्रष्टापिंसं थःथःगु बाखं पाठ यानादीगु खः । थ्यंमथ्यं घौछितक न्ह्याःगु उगु विश्व बाखं मुँज्याय् अमेरिका, नेदरल्याण्ड व नेपाःया नांजाःपिं बाखं च्वमिपिंसं ब्वति कयादीगु खः। नांजाःम्ह आख्यानकार मथुरा साय्मिपाखें बाखं ब्वनाः न्ह्याःगु मुँज्याय् विमलप्रभा वज्राचार्य, दिव्या ताम्राकार, केशरमान ताम्राकार, नरेश अमात्य, राजा शाक्य, रितादेवी प्रधान जोशी, वासव राजोपाध्याय, श्रीलक्ष्मी श्रेष्ठ, डा. बालगोपाल श्रेष्ठं थःथःगु बाखं ब्वनाः न्यंकादीगु खः।

अनलाइनपाखें प्रत्यक्ष न्ह्याःगु ज्याझ्वः ताःलाकेत वासव राजोपाध्याय, प्रमेश श्रेष्ठ व सन्तोष श्रेष्ठ लगायत ग्वाहालि यानादीगु खःसा थुकियात फेसबुक व युट्युब थेंज्याःगु सामाजिक संजालय् नं स्वये फइगु व्यवस्था याःगु दु ।