नर्भिक अस्पतालं ११ वडाया वासिन्दातय्त छुट बीगु

येँ – नर्भिक इन्टरनेशन अस्पतालं यँे महानगरपालिका ११ वडाया वासिन्दातय् उपचारय् २० प्रतिशत छुटे बीगु जूगु दु । नर्भिक अस्पताल नीन्यादँ क्यंगु लसताय् ११ वडा वासिन्दातय्त छुट बीगु घोषणा जूगु खः । थौं हे छगू ज्याझ्वःया दथुइ नर्भिक अस्पतालया कार्यकारी निर्देशक राजेन्द्रबहादुर सिंह व ११ नं वडाया अध्यक्ष हिरालाल तण्डुकार दथुइ छुट बीगु सम्बन्धी सम्झौताय् हस्ताक्षर नं जूगु खः ।

सम्झौता कथं ११ वडाया वासिन्दातय्त कार्डया व्यवस्था यानाः उगु कार्ड दुपिंत छुट बीगु जुइ । अथेहे नर्भिक २५ दँ क्यंगु लसताया झ्वलय् सगरमाथा गःवनेत्यंपिं मिसापिं पत्रकारतय्त २५ लाख तकाया चेक व नर्भिकया ध्वाँय् नं लःल्हाःगु दु । सगरमाथा गःवनीपिं मिस्तय्त नर्भिकया ध्वाँय् सगरमाथाया च्वकाय् ब्वयेकी ।

ज्याझ्वलय् न्ववानादिसें सगरमाथा आरोहण दलया नेतृ रोजिता बुद्धाचार्यं नर्भिकं स्वास्थ्य ख्यःया सगरमाथा गयेधुंकूगु धासें आः थःपिंसं नर्भिकया ध्वाँय् सगरमाथाया च्वकाय् ब्वयेका वयेगु बचं बियादिल ।नर्भिकया अध्यक्ष वसन्त चौधरीं २५ दँ न्ह्यः २५ बेड तयाः सुरु जूगु नर्भिक होमं थौंकन्हय् थीथी विशेषज्ञ सेवा, अत्याधुनिक उपकरणसहित उपचार बियाः विश्वसनीय अस्पताल कथं थःत थनेत ताःलाःगु खँ कनादिल ।

सम्बन्धित बुखँ

LEAVE YOUR COMMENTS