कर्माचार्यपाखें १६५ क्वःखुसी हिदान

येँ – नेपाल स्वयमसेवी रक्तदाता समाजया केन्द्रीय अध्यक्ष पे्रमसागर कर्माचार्यं १६५ क्वःखुसी हिदान यानादीगु दु । झापा जिल्लाया बिर्तामोडय् जूगु हिदान ज्याझ्वलय् वय्कलं हिदान यानादीगु खः ।

बिर्तामोडया मुक्ति चोकय् च्वंगु विराट अर्जुन उपभोक्ता सहकारी संस्थापाखें ग्वसाः ग्वःगु विशेष हिदान ज्याझ्वःया निंतिं ग्वसाः खलःया इनापयात स्वीकार यासें वय्कः हिदानया निंतिं अनथ्यंक झायाः हिदान यानादीगु खः ।

झापा जिल्ला सहकारी संघया अध्यक्ष गणेश ढकाल प्रमुख आतिथ्यताय् जूगु ज्याझ्वलय् समाजया केन्द्रीय अध्यक्ष कर्माचार्य विशेष पाहांकथं ब्वति कयादीगु खः । नेपाल रेडक्रसा सोसाइटी बिर्तामोडया सभापति सजेश शिवाकोटी पाहांकथं झायादीगु ज्याझ्वलय् कर्माचार्ययात मूपाहांलिसें मेपिं पाहांपिंसं मंकाःकथं हनेज्या नं यानादीगु खः ।

संस्थाया अध्यक्ष नविन खरेलया सभापतित्वय् जूगु ज्याझ्वलय् उपाध्यक्ष यादवकुमार ओलीं लसकुस यानादीगु खःसा नेरेसो बिर्तामोड उपशाखाया सहसचिवलिसें रक्तसंचार सेवा केन्द्र बिर्तामोडया ओमप्रकाश लुइँटेलं सुभाय् देछानादीगु खः ।
ज्याझ्वलय् कर्माचार्यं हिदान यानादीगु १६५ क्वः थ्यंगुया सम्मान व उकियात मूल्यांकन यासें उलि हे पिन्ट हि संकलन याःगु खः ।