आदिवासी जनजाति साहित्यकारया नेवाः राज्य समिति घोषणा
यल- आदिवासी जनजाति साहित्यकार महासंघ अन्तर्गतया नेवाः राज्य समिति गठन याःगु दु । वंगु बुधवाः थनया सातोआकी भवनय् जूगु छगू ज्याझ्वःया दथुइ आदिवासी जनजाति साहित्यकार महासंघया नेवाः राज्य तदर्थ समितिया घोषणा याःगु खः ।
नेवाः राज्य तदर्थ समितिया संयोजक शाक्य सुरेनया सभापतित्वय् जूगु ज्याझ्वलय् मूपाहांकथं महासंघया तदर्थ समितिया संयोजक राजन मुकारुङ मूपाहांकथं झायादीगु खः । नेवाः देय् दबूया नायः नरेश ताम्राकार विशेष पाहांकथं झायादीगु ज्याझ्वलय् महासंघया तदर्थ समितिया केन्द्रीय दुजः कवयित्री रजनी मिला महर्जन, पुलांम्ह सांसद जीतवीर लामा, नेवाः न्ह्यलुवा नापं साहित्यकार समालोचक डा. पुष्पराज राजकर्णिकार, नेवाः न्ह्यलुवा डा. महेशमान श्रेष्ठ, नेपाल तामाङ घेदुङया उपाध्यक्ष अजितमान तामाङ पाहांकथं झायादीगु खः ।
ज्याझ्वःया सभानायः शाक्य सुरेनं लसकुस यानादीगु ज्याझ्वलय् मूपाहां मुकारुङं नेवाः राज्य तदर्थ समितिया घोषणा यानादीगु खःसा वय्कःपिंत विशेष पाहां दबूया नायः ताम्राकार खादा क्वखायेकादीगु खः । घोषित तदर्थ समितिया संयोजकय् शाक्य सुरेन, सह संयोजकय् सुधिर ख्वबि, सचिवय् नवीनप्रकाश श्रेष्ठ, कोषाध्यक्षय् कविन्द्रलाल प्रधान च्वनादीगु दुसा दुजलय् विमलप्रभा वज्राचार्य, दिव्या ताम्राकार, शिला साय्मि, अर्जुन महर्जन, मिना वज्राचार्य, राजुराम मुनंकःमि च्वनादीगु दु ।
ज्याझ्वलय् नवासें मूपाहां मुकारुङं महासंघ अन्तर्गतया च्यागू थीथी जातीय राज्य समिति गठन यायेगु झ्वलय् निलाया दुने च्यागू राज्य समिति गठन यायेगु लक्ष्य दुगु व नेवाः राज्य समिति न्हय्गूगु जूगु जानकारी बियादिल । वय्कलं थ्व स्वयां न्ह्यः साहित्यकारतय् लिम्बुवान, मगरात, तमुवान, थरुहट, ताम्सालिङ राज्य समिति गठन जुइधुंकूगु नं जानकारी बियादिल ।
लिसें थ्व अवधि दुने झिंप्यंगू अन्तर्राष्ट्रिय समिति नं गठन यायेगु ज्या जुइधुंकूगु धासें चैत ७ व ८ गते निन्हुयंकं राष्ट्रियस्तरया भेला यायेत्यनागु नं जानकारी बियादिल ।
ज्याझ्वलय् भिंतुना न्वचु बियादिसें नेवाः न्ह्यलुवा डा. श्रेष्ठं नेवाः समाजयात लँ क्यनीगु कथंया साहित्यया रचना जूगु खने मदु धयादिल । गुलि नं साहित्यया सृजना जुल उकिं नेवाः आन्दोलनयात तिबः बीगु ज्या मजू धासें नेवाः आन्दोलनयात तिबः जुइगु व नेवाः समाजयात लँ क्यनीकथंया साहित्य सिर्जना यायेत इनाप यानादिल ।
वय्कलं छगू प्रसंगय् जनसंख्याया ल्याखं नेवाःत अप्वः दुसां आदिवासी जनजातिमध्ये दकलय् न्हापां अस्तित्व लोप जुइगु धलखय् नं थ्व हे जाति लानाच्वंगु व नेवाः भाय् नं सीगु अवस्थाय् थ्यनाच्वंगु दु धयादिल ।
ज्याझ्वलय् पाहाकथं झायादीपिं सकसिनं भिंतुना बियादीगु खःसा सहसंयोजक ख्वबिं सुभाय् देछानादीगु खः ।
LEAVE YOUR COMMENTS