प्रधानन्यायाधीशयात ३ बजे तकया अल्टिमेटम
येँ – प्रधान न्यायाधीश चोलेन्द्र शम्शेर जबराया राजीनामा माग यासें इजलास बहिष्कार यानाच्वंपिं न्यायाधीशत दुथ्याःगु सर्वोच्च अदालतया फुटकोर्टं आः गोला प्रणालीं इजलास क्वःछीगु कथं नियमावली संशोधन यायेगु निर्णय याःगु दु ।
म्हिगः च्वंगु बैठकं थुकिया निर्देशिका कार्यविधि पारित याःगु खः । बैठकय् दुथ्याःपिं झिंच्याम्ह न्यायधीशतय्सं हस्ताक्षर यानाः प्रधान– न्यायाधीशया थाय् निर्णय छ्वःगु दु । सर्वोच्च फुलकोर्टं औपचारिक निर्णय यानाः कानुन मन्त्रालय छ्वयाः राज– पत्रय् पिहां वयेवं उगु कार्यविधि लागू जुइ । गोला प्रक्रियापाखें बृहत पूर्ण, पूर्ण, एक न्यायाधीशया इजलास व मंकाः इजलास गठन जुइ ।
थ्व स्वयां न्ह्यः वंगु साउन २४ गते च्वंगु सर्वोच्चया पूर्ण बैठकं गोलाप्रथापाखें पेसी व्यवस्थापन यायेमाःगु धासें न्यायाधीश मीरा खड्काया संयोजकत्वय् समिति गठन याःगु खःसा उगु समितिं नं गोला प्रथां इजलास गठन यायेमाःगु प्रतिवेदन बिउगु खः ।
गोलाप्रथां इजलास क्वःछीगु निर्णयपाखें न्यायालयया सुधार जुइगु व प्रधानन्यायाधीशपाखें लाथेपाथे पेसी क्वःछीगु ज्या नं निणन्त्रण जुइगु खँ न्यायाधीशतय्सं धाःगु दु । थ्वहे वइगु आइतवाःनिसें गोलप्रथां पेसी क्वःछीगु तयारी जुयाच्वंगु दु ।
गोला प्रथां मुद्दा सुनवाई यायेगु निर्णय याःपिं न्यायाधीशपिं नेपाल बार एसोसिएसन व प्रधानन्यायाधीश दथुइ सहमति मजुइवं प्रधानन्यायाधीश जबरालिसे बेञ्च सेयरिङ मयायेगु सहमति याःगु दु । इजलासं लिहां वनेत तयार जुयाच्वंपिं न्यायाधीशया पलाःयात कयाः नेपाल बारं आशंका यायेवं न्यायाधीशतय्सं थःपिं मुद्दा स्वयेत इजलास वंसां नं जबरालिसे इजलासय् धाःसा मच्वनेगु निर्णय याःगु खः ।
म्हिगः नं नेपाल बार एसोसिएसनं सर्वोच्च अदालतय् धर्ना बिउगु दु । म्हिगः धर्ना बियाच्वंपिं वकिलतय्त प्रहरीं बल छ्यलेवं नेपाल बारया अध्यक्ष चण्डेश्वर श्रेष्ठ लगायत छुं कानून व्यवसायीत घाःपाः जूगु खः ।
प्रहरी हस्तक्षेप लिपा नेपाल बारया पदाधिकारीपिं आकस्मिक बैठक च्वनाः पत्रकार सम्मेलन यासें प्रधानन्यायाधीश जबरायात थौं न्हिनय् ३ बजे तक राजीनामा बीत अल्टिमेटम बिउगु दु । थौं ३ बजे तक राजीनामा मबिल धाःसा थप आन्दोलनया ज्याझ्वः घोषणा यायेगु ख्याच्वः बिउगु दु ।
LEAVE YOUR COMMENTS