नेकपा कचवनं आयोगय् तनाव

येँ -नेपाल कम्युनिष्ट पार्टीया आन्तरिक ल्वापुं यानाः निर्वाचन सम्बन्धी तयारीया ज्या गय् यानाः न्ह्याकेगु धकाः निर्वाचन आयोगयात समस्या जूगु दु । थुकिया लागिं सुझाव कायेत आयोगं निर्वाचन आयोगया पुलांपिं आयुक्ततलिसे सहलह ब्याकूगु दु ।

आयोगं सहलहया लागिं सःतूपिं पुलांपिं प्रमुख आयुक्ततय्सं नेकपाया विवाद समाधान मजूतले चुनावया ज्या न्ह्यःने न्ह्याकल धाःसा उकिया लिच्वः बांमलाः कथं वइ धासें बरु चुनाव हे लिछ्यानाः जूसां दकलय् न्हापां थ्व समस्या निं समाधान यायेमाः धकाः सुझाव बिउगु खँ सीदुगु दु ।

निर्वाचन आयोगं पुलापिं प्रमुख आयुक्तपिं अयोधिप्रसाद यादव, निलकण्ठ उप्रेति, भोजराज पोखरेल व सूर्यप्रसाद श्रेष्ठपिंलिसे थुकिया बारे सुझाव काःगु खः ।

उगु इलय् पुलापिं प्रमुख आयुक्तपिं सकस्यां नं नेकपाया विवाद समाधान हे आःया दकलय् प्रमुख ज्या जुइमाः धकाः सुझाव बिउगु खः । नेकपाया विवाद समाधान मजूतले चुनावया लागिं राजनीतिक दल दर्ताया ज्या मन्ह्याकेत नं वय्कःपिंसं सुझाव बिउगु खः । नेकपाया समस्या समाधान मयासे न्ह्याः वन धाःसा लिपा थाकुगु अवस्था वइगु व उकिं यानाः चुनाव यायेत कठिन जुइफुगु खँ वय्कःपिंसं कनादीगु खः ।

नेकपा विभाजन जुया वंसां निगुलिं पार्टीं पिने च्वनाः आधिकारिक पार्टी थःपिं हे खः धकाः दावी यानाच्वंसां निर्वाचन आयोगय् वयाः आः तक आधिकारिकताया दावी धाःसा याः वःगु मदुनि । निगुलिं पार्टीं आधिकारिताया दावी याः मवःगु जुयाः आयोग थम्हं हे गुगु पार्टी आधिकारिक खः धकाः अथें धाये मफइगु खँ धायेगु यानाच्वंगु दु ।

पुलांपिं प्रमुख आयुक्ततय्सं धाःसा थज्याःगु अवस्थाय् निर्वाचन आयोगं निगुलिं दलया अध्यक्षतय्त हे सःताः खँल्हाबल्हा यायेमाःगु सुझाव बिउगु खः । छुं जुयाः समस्या समाधान मजुल धाःसा बरु निर्वाचनया तिथि हे लिछ्यायेमाःसां लिछ्याये माली धइगु सुझाव नं वय्कःपिंपाखें वःगु खँ सीदुगु दु ।

सूत्रं धाः कथं यदि पार्टीया आन्तरिक समस्या समाधान मजुल धाःसा चुनाव यायेत थाकुइगु अवस्था बारे निगुलिं पार्टीया अध्यक्षपिंत प्रस्ट जुइक धया बीमाःगु खँ नं वय्कःपिंसं कनादीगु खः ।

नेकपाय् प्रधानमन्त्री केपी ओली पुचः व दाहाल–नेपाल पुचलं छम्हं मेम्हेसित निष्काशन यासें थःपिं आधिकारिक पार्टी खः धकाः दावी यानाच्वंसां निर्वाचन आयोगं धाःसां निगुलिं पार्टीं आयोगय् वयाः दावी मयाःगु कारणं आयोगं आःया लागिं नेकपा आः तक विभाजन मजूनि धकाः थःगु निर्णय याःगु खः ।

लिसें आयोगं ओली पुचलं थपे यानाः हःगु केन्द्रीय दुजःतय् नांयात नं दर्ता मयासे पार्टीया केन्द्रीय दुजःतय् ल्याः अझं ४४१ हे खःनि धकाः नं जनाउ बिउगु खः । आयोगया उगु हे सुचंयात आधार दयेकाः हानं निगुलिं पार्टीं आः आयोगं थःपिंत हे आधिकारिता प्रदान याइगु जुल धकाः दावी शुरु याना हःगु खः ।

सम्बन्धित बुखँ

LEAVE YOUR COMMENTS